തിരുവനന്തപുരം : ഹരിപ്പാട് എംഎൽഎയും ആഭ്യന്തര മന്ത്രിയുമായ രമേശ് ചെന്നിത്തലയെ വിമർശിച്ച് ഫേസ്ബുക്കിൽ കമൻ്റ് ചെയ്ത യുവാവിനെതിരെ കേസെടുത്ത നടപടിയെ രൂക്ഷമായി വിമർശിച്ച് മുതിർന്ന ബിജെപി നേതാവ് സന്ദീപ് വാചസ്പതി. മണ്ണാറശാല സ്വദേശി അനിൽ കുമാറിനെതിരെ ബിഎൻഎസ് 351, കേരള പോലീസ് ആക്ട് 120 (o) വകുപ്പുകൾ പ്രകാരം ഹരിപ്പാട് പോലീസ് കേസെടുത്തതിൽ
തന്റെ ഫേസ്ബുക്കിലൂടെയാണ് സന്ദീപ് പ്രതിഷേധം രേഖപ്പെടുത്തിയത്.
ഭരണം മാറിയിട്ടും കേരള പോലീസിന്റെയോ പോലീസ് മന്ത്രിയുടെയോ മനോനിലയിൽ യാതൊരു മാറ്റവും ഉണ്ടായിട്ടില്ല എന്നാണ് മനസിലാകുന്നത്. കൂടാതെ വിമർശിക്കുന്നവരെ ക്രിമിനൽ കേസിൽ പ്രതിയാക്കുന്ന രീതിക്ക് ഇടത് വലത് വ്യത്യാസമില്ലെന്ന് സന്ദീപ് ഫേസ്ബുക്കിൽ തുറന്നടിച്ചു.
ഇതിനു പുറമെ അനിൽ കുമാർ ഫേസ്ബുക്കിൽ ഇട്ട കമൻ്റ് ഇതിനൊപ്പം ചേർത്തിട്ടുണ്ട്. മന്ത്രി നിർദ്ദേശിച്ചിട്ടാണ് കേസ് എടുത്തത് എന്ന് ആരോപിക്കുന്നില്ല. കേസിനെപ്പറ്റി അറിഞ്ഞിട്ടില്ല എങ്കിൽ ഇക്കാര്യം അങ്ങയുടെ ശ്രദ്ധയിൽ പെടുത്തുകയാണ്. ആഭ്യന്തര മന്ത്രിയെയുടെ ജീവൻ അപകടത്തിലാക്കുന്ന, അദ്ദേഹത്തെ ഭീഷണിപ്പെടുത്തുന്ന എന്ത് പരാമർശമാണ് ഇതിൽ ഉള്ളത് എന്ന് അറിയാൻ ആഗ്രഹമുണ്ട്. വെറുമൊരു ഫേസ്ബുക്ക് പോസ്റ്റിന്റെ പേരിൽ കേരള പോലീസ് ആക്ടിലെ സെക്ഷൻ 120 ചാർത്തരുതെന്ന് കേരള ഹൈക്കോടതി ഉത്തരവിട്ടിട്ടുള്ള സാഹചര്യത്തിലാണ് പോലീസ് കേസെടുത്തതെന്നും സന്ദീപ് ഫേസ്ബുക്കിൽ പരാമർശിക്കുന്നുണ്ട്.
