പത്തനംതിട്ട:ലഹരിവേട്ടയ്‌ക്കുളള ഡാന്‍സഫ് സംഘം മദ്യപിച്ച് ലക്കുകെട്ട് പൊലീസ് ജീപ്പ് ഓടിച്ചതിനെ തുടര്‍ന്ന് നാട്ടുകാര്‍ തടഞ്ഞുവച്ചു.പത്തനംതിട്ട ഡിവൈഎസ്പിക്ക് കീഴിലുള്ള ഡാന്‍സാഫ് ഉദ്യോഗസ്ഥരാണ് ലക്കുകെട്ട് ജീപ്പ് ഓടിച്ചതും തുടര്‍ന്ന് ജനം ഇടപെട്ടതും.
പൊലീസ് ജീപ്പിന്റെ നിയന്ത്രണം നഷ്ടമായതോടെ റോഡിലുണ്ടായിരുന്ന ഒരു വനിതാ ഓട്ടോ ഡ്രൈവര്‍ തലനാരിഴയ്‌ക്കാണ് അപകടത്തില്‍ നിന്നും രക്ഷപ്പെട്ടത്. അപകടകരമായ രീതിയില്‍ നിയന്ത്രണം വിട്ട പൊലീസ് ജീപ്പ് നാട്ടുകാര്‍ ചേര്‍ന്ന് തടഞ്ഞുവെക്കുകയായിരുന്നു. നാട്ടുകാര്‍ തടിച്ചുകൂടി ചോദ്യം ചെയ്യാന്‍ തുടങ്ങിയതോടെ, വാഹനത്തിലുണ്ടായിരുന്ന ഒരു പൊലീസ് ഉദ്യോഗസ്ഥന്‍ ജീപ്പില്‍ നിന്നും ഇറങ്ങി ഓടി കടന്നുകളഞ്ഞു.
സംഭവത്തെ തുടര്‍ന്ന് സ്ഥലത്ത് കൂടുതല്‍ പൊലീസ് എത്തി വാഹനം ഓടിച്ച ഉദ്യോഗസ്ഥനെ കസ്റ്റഡിയിലെടുത്തു.ലഹരിക്കെതിരെ കര്‍ശന നടപടിയെന്ന പ്രഖ്യാപനവുമായി സര്‍ക്കാര്‍ മുന്നോട്ട് പോകവെയാണ് ഈ സംഭവം. സംഭവത്തെക്കുറിച്ച് ഔദ്യോഗിക റിപ്പോര്‍ട്ട് ലഭിച്ചതിനുശേഷം കുറ്റക്കാരായ ഉദ്യോഗസ്ഥര്‍ക്കെതിരെ സസ്‌പെന്‍ഷന്‍ അടക്കം കര്‍ശനമായ വകുപ്പുതല നടപടികളിലേക്ക് നീങ്ങുമെന്ന് ജില്ലാ പൊലീസ് മേധാവി വ്യക്തമാക്കി.
