കൊച്ചി : യു എസ് ആസ്ഥാനമായി പ്രവര്ത്തിക്കുന്ന കോറോ ഹെല്ത്തിലെ കൊച്ചി, കോഴിക്കോട് ശാഖകളിലെ കൂട്ടപ്പിരിച്ചുവിടലുമായി ബന്ധപ്പെട്ട് തൊഴില് മന്ത്രി ബിന്ദു കൃഷ്ണ ചര്ച്ചയ്ക്ക്. വെള്ളിയാഴ്ച മന്ത്രി എറണാകുളത്തെത്തി കമ്പനി അധികൃതരുമായി നേരിട്ട് ചര്ച്ച നടത്തും. തൊഴില് വകുപ്പ് സ്പെഷ്യല് സെക്രട്ടറി, ലേബര് കമ്മീഷണര് എന്നിവര് കമ്പനി അധികൃതരുമായി ചൊവ്വാഴ്ച ചര്ച്ച നടത്തും.
കേന്ദ്ര ഇടപെടല് വേണമെങ്കില് അതിനും നടപടികള് സ്വീകരിക്കുമെന്ന് മന്ത്രി പറഞ്ഞു.ജോലി നഷ്ടപ്പെട്ടവരുടെ കാര്യത്തില് അനുകൂലമായ ഒരു തീരുമാനം ഉണ്ടാകും എന്നാണ് സര്ക്കാര് പ്രതീക്ഷിക്കുന്നത് എന്ന് മന്ത്രി വ്യക്തമാക്കി.ഒരു ദിവസം രാവിലെ സ്ഥാപനത്തില് ജോലിക്കെത്തിയപ്പോഴാണ് പിരിച്ചു വിട്ടതായി ജീവനക്കാര് അറിയുന്നത്.കോറോ ഹെല്ത്ത് കോഴിക്കോട് കൊച്ചി ബ്രാഞ്ചുകളിലെ 900 ജീവനക്കാരാണ് പെരുവഴിയിലായത്.
ലേബര് കോഡിന്റെ ചുവടുപിടിച്ചാണ് രണ്ടരമാസത്തെ ശമ്പളം നല്കി നോട്ടീസ് പോലുമില്ലാത്ത പിരിച്ചുവിടല്. സാമ്പത്തിക പ്രശ്നം പറയുന്ന കമ്പനി ചെന്നൈ, ബെംഗളൂരു, ഹൈദരാബാദ് നഗരങ്ങളില് റിക്രൂട്ട്മെന്റ് തകൃതിയായി നടത്തുന്നുണ്ടെന്നും കേരളത്തിലെ പിരിച്ചുവിടല് ചൂണ്ടിക്കാണിച്ച് മറ്റുള്ളവരെ ഭീഷണിപ്പെടുത്തുന്നുണ്ടെന്നും പിരിച്ചുവിട്ടവര് പറഞ്ഞു.
