മെക്സിക്കോ സിറ്റി: വിസ്മയങ്ങളും വൈഭവങ്ങളും തുടര്‍ന്നുകൊണ്ടിരിക്കുന്ന ലോകകപ്പ് ഫുട്ബോള്‍ 2026ന്റെ റൗണ്ട് ഓഫ് 32ല്‍ ഒരു ആവേശപ്പോരാട്ടം കൂടി. ഒരുവശത്ത് അച്ചടക്കവും കൃത്യതയും ഒത്തുചേര്‍ന്ന ഇംഗ്ലണ്ട്. മറുഭാഗത്ത് ആതിഥേയരായ മെക്സിക്കോ. ലോക ഫുട്ബോളില്‍ സജീവമായ മെക്സിക്കോയ്‌ക്ക് ലോകകപ്പില്‍ ഇതുവരെ മികച്ചൊരു മുന്നേറ്റത്തിന് സാധിച്ചിട്ടില്ല. ഇത്തവണ ആ കുറവ് പരിഹരിക്കാനുള്ള മുന്നൊരുക്കത്തോടെ അവര്‍ ഗ്രൂപ്പ് ഘട്ടത്തില്‍നിന്നേ തയ്യാറെടുത്തു കഴിഞ്ഞു. ഏറെ കാലത്തെ നിരാശായാര്‍ന്ന ഫലത്തിന് ശേഷം കഴിഞ്ഞ രണ്ട് ലോകകപ്പുകളില്‍ മികച്ച പ്രകടനം കാഴ്‌ച്ചവ്ക്കാനായ ടീം ആണ് ഇംഗ്ലണ്ട്. 2018ല്‍ റഷ്യയിലും 2022ല്‍ ഖത്തറിലും ഗാരെത്ത് സൗത്ത്ഗേറ്റിന് കീഴിലാണ് ഇറങ്ങിയതെങ്കില്‍ ഇക്കുറി കുറേക്കൂടി ഖ്യാതി നേടിയ പരിശീലകന്‍ തോമസ് ടുഷേലിന് കീഴിലാണ്.
പ്രാഥമിക റൗണ്ടില്‍ ഗ്രൂപ്പ് എയില്‍ നിന്നും ജേതാക്കളായാണ് മെക്സിക്കോയെത്തുന്നത്. ഈ ലോകകപ്പില്‍ ആദ്യമായി നോക്കൗട്ട് ഉറപ്പാക്കുന്ന ടീം. ഗ്രൂപ്പ് ഘട്ടത്തിലെ മൂന്നാം മത്സരത്തില്‍ അല്‍പ്പസമയം കളത്തിലിറങ്ങി സാമീപ്യമറിയിച്ച ശേഷം ഇതിഹാസ ഗോളി ഗില്ലര്‍മോ ഒച്ചോവ ഗ്ലൗസ് അഴിച്ചു. മറ്റ് മെക്സിക്കന്‍ താരങ്ങള്‍ ഇന്ന് രാത്രി (ഭാരത സമയം നാളെ പുലര്‍ച്ചെ 5.30ന്) മെക്സിക്കോ സിറ്റി(അസ്റ്റേക്ക) സ്റ്റേഡിയത്തില്‍ പൊരുതാനിറങ്ങും. ഈ ലോകകപ്പിന്റെ അവസാന എട്ടില്‍ ഒരു കൂട്ടരാകാന്‍. സ്വന്തം നാട് സഹആതിഥേയം വഹിക്കുന്ന ഈ ലോകകപ്പ് ആണ് ചെറുതെങ്കിലും ഫുട്ബോളിലെ കരുത്തന്‍മാരായ ഈ ടീമിന് വലിയ പ്രതീക്ഷയേകുന്നത്. പക്ഷെ ടുഷേലിന്റെ ഇംഗ്ലീഷ് ചാനല്‍ നീന്തിക്കയറുക അത്ര എളുപ്പമല്ല. ഗ്രൂപ്പ് ഘട്ടത്തില്‍ ജര്‍മനിയെ തോല്‍പ്പിച്ച ഇക്വഡോറിനെ റൗണ്ട് ഓഫ് 32ല്‍ തുരത്തിയാണ് മെക്സിക്കോ പ്രീക്വാര്‍ട്ടറിലെത്തിയിരിക്കുന്നത്. അന്നത്തെ ആ വിജയവും മെക്സിക്കോ സിറ്റി സ്റ്റേഡിയത്തിലായിരുന്നു.
റൗണ്ട് ഓഫ് 32ല്‍ ഇംഗ്ലണ്ട് കോംഗോയെ പൊരുതി തോല്‍പ്പിച്ചാണ് മറികടന്നത്. ശക്തമായ പോരാട്ടമല്ല ഇംഗ്ലണ്ട് മത്സരത്തില്‍ കാഴ്‌ച്ചവച്ചത്. ഇന്നത്തെ മത്സരത്തില്‍ മെക്സിക്കോ വലിയ വെല്ലുവിളിയായിരിക്കും ഉയര്‍ത്തുകയെന്നതില്‍ സംശയമില്ല. അതിനെ നേരിടാന്‍ ഇംഗ്ലണ്ടിന്റെ അച്ചടക്കമുള്ള കളികൊണ്ട് സാധിക്കുന്നത് കാണാനാണ് ലോകം കാത്തിരിക്കുന്നത്. ഗ്രൂപ്പ് ഘട്ടത്തിലെയും ആദ്യ നോക്കൗട്ട് മത്സരത്തിലെയും മെക്സിക്കന്‍ കരുത്ത് ആവര്‍ത്തിച്ചാല്‍ ഇംഗ്ലണ്ടിനെയും മറികടക്കല്‍ വലിയ കടമ്പയായേക്കില്ല.
