തിരുവനന്തപുരം: സംസ്ഥാനത്തിന്റെ പേര് കേരള എന്നതിന് പകരം കേരളം എന്നാക്കാനുള്ള രാഷ്ട്രപതിയുടെ റഫറന്സിന് നിയമസഭ ഐക്യകണ്ഠ്യേന അംഗീകാരം നല്കി.
സംസ്ഥാനത്തിന്റെ പേര് കേരളം എന്നാക്കാനുള്ള പ്രമേയം നേരത്തെ നിയമസഭ പാസാക്കി കേന്ദ്രത്തിന് നല്കിയിരുന്നു. ഇതനുസരിച്ച് കേന്ദ്രസര്ക്കാര് ബില്ല് തയാറാക്കി രാഷ്ട്രപതിക്ക് കൈമാറി. രാഷ്ട്രപതിയുടെ റഫറന്സോടെയാണ് ബില് നിയമസഭയിലേക്ക് എത്തിയത്. ആദ്യമായാണ് രാഷ്ട്രപതിയുടെ റഫറന്സ് കേരള നിയമസഭയില് എത്തുന്നത്. ചരിത്രപരമായ മുഹൂര്ത്തം എന്നാണ് സ്പീക്കര് തിരുവഞ്ചൂര് രാധാകൃഷ്ണന് ബില്ലിനെ വിശേഷിപ്പിച്ചത്.
10 ഖണ്ഡികകളാണ് ബില്ലില് ഉണ്ടായിരുന്നത്. അത് ഓരോന്നും വായിച്ച് സ്പീക്കര് അംഗങ്ങളുടെ ഐക്യകണ്ഠ്യേനയുള്ള അംഗീകാരം നേടി. അതിനുശേഷം എല്ലാ അംഗങ്ങളുടെയും പൂര്ണ പിന്തുണയോടെ രാഷ്ട്രപതിയുടെ റഫറന്സ് സഭ അംഗീകരിക്കുകയായിരുന്നു. നിയമസഭ അംഗീകാരം നല്കിയ ബില് രാഷ്ട്രപതിക്ക് കൈമാറും. അവിടെനിന്നും കേന്ദ്രസര്ക്കാര് പാര്ലമെന്റിലെത്തിച്ച് പാസാക്കുന്നതോടെ സംസ്ഥാനത്തിന്റെ പേര് ഔദ്യോഗികമായി കേരളം എന്നാകും. സംസ്ഥാനത്തിന്റെ പേര് കേരളം എന്നാക്കണമെന്നാവശ്യപ്പെട്ട് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖറും കേന്ദ്രസര്ക്കാരിന് നിവേദനം നല്കിയിരുന്നു. അതുകൂടി പരിഗണിച്ചാണ് കേന്ദ്രം നിയമ നിര്മാണത്തിലേക്ക് നീങ്ങിയത്.
