ആലപ്പുഴ: പിണറായി വിജയനെതിരെ പാര്ട്ടി സഹയാത്രികരും പരസ്യമായി രംഗത്തെത്തുന്നത് സിപിഎമ്മിന് തലവേദനയാകുന്നു. പാര്ട്ടി യോഗങ്ങളില് വിമര്ശനം ഉയരുമ്പോള് അതാത് വേദികളില് നേതൃത്വം മറുപടി പറഞ്ഞ് പ്രശ്നം താല്ക്കാലികമായി അവസാനിപ്പിക്കുകയാണ് പതിവ്. എന്നാല് ഇടത് അനുകൂലികള് സമുഹമാദ്ധ്യമങ്ങളില് ഉള്പ്പടെ പിണറായി വിജയനെതിരെ രംഗത്തെത്തിയത് ഏങ്ങനെ ചെറുക്കുമെന്ന് അറിയാതെ കുഴങ്ങുകയാണ് പിണറായി അനൂകുലികള്.
പ്രതിപക്ഷ നേതാവ് പിണറായി വിജയന് ഇനി വിശ്രമിക്കുകയാണ് ഉചിതമെന്ന് ടി.എം. തോമസ് ഐസക്ക് ധനമന്ത്രിയായിരുന്നപ്പോള് അഡീ. പ്രൈവറ്റ് സെക്രട്ടറിയായിരുന്ന ഗോപകുമാര് മുകുന്ദന്. ഭാവിയിലും ഇടതുപക്ഷം നിലനില്ക്കാന് പിണറായി സ്ഥാനം ഒഴിയുന്നതാണ് ഉചിതമെന്നും പിണറായി വിശ്രമിക്കട്ടെ എന്നുമാണ് ഗോപകുമാര് ഫേസ്ബുക്കില് കുറിച്ചത്. ജില്ല സെക്രട്ടേറിയറ്റിലും ജില്ലാ കമ്മറ്റികളിലും ഈ ആവശ്യം ഉയര്ന്നിരുന്നെങ്കിലും. കടുത്ത ഇടത് സഹയാത്രികനും പിണറായി മന്ത്രിസഭയുടെ ഭാഗമായി പ്രവര്ത്തിക്കുകയും പരസ്യമായി ഈ ആവശ്യം ഉന്നയിക്കുന്നത് ആദ്യമാണ്.
‘ഇന്ന് സഖാവ് പിണറായി വിജയന് ഏതോ ഒരു യോഗത്തില് പ്രസംഗിക്കാന് വരുന്ന വിഷ്വല്സ് കണ്ടു. ഇടുങ്ങിയ പോഡിയത്തിന്റെ പ്രയാസം പറയുകയാണ് പിണറായി. വാസ്തവമാണ്. അടി പിന്നോട്ട് വച്ചാല് വീഴും. ഈ സ്ഥിതി ഒഴിവാക്കി സഖാവ് പിണറായി വിജയന് വിശ്രമിക്കുകയല്ലേ വേണ്ടത്. നമ്മുടെ കാല ശേഷവും ഇടതുപക്ഷം വേണമല്ലോ?. വിശ്രമിക്കു പ്രിയ സഖാവേ… ഇതാണ് പോസ്റ്റ്.
തോമസ് ഐസക്ക് അടക്കമുള്ള നേതാക്കളുടെ അറിവോടെയാകാം ഈ പോസ്റ്റ് എന്നാണ് വിലയിരുത്തപ്പെടുന്നത്. കെ.ജെ. ജേക്കബ് അടക്കം നിരവധി ഇടത് സഹയാത്രികര് ഈ പോസ്റ്റിനെ പിന്തുണച്ചിട്ടുമുണ്ട്. തോമസ് ഐസക്കിന്റെ ഏറ്റവും അടുത്തയാളായാണ് ഗോപകുമാര് അറിയപ്പെടുന്നത്. ഇരുവരും ചേര്ന്ന് പുസ്തകങ്ങളും രചിച്ചിട്ടുണ്ട്. വരും ദിവസങ്ങളില് പാര്ട്ടി അണികള് കൂടുതല് പേര് പിണറായി വിജയനെതിരെ പരസ്യമായി രംഗത്തെത്താന് സാധ്യതയുണ്ട്.
ജില്ലാതല അവലോകന യോഗങ്ങളിലെല്ലാം പിണറായി വിജയനും, പാര്ട്ടി സംസ്ഥാന സെക്രട്ടറി എം. വി. ഗോവിന്ദനും എതിരെ അതിരൂക്ഷമായ വിമര്ശനങ്ങളാണ് ഉയര്ന്നത്. ഇന്നലെ തുടങ്ങിയ ഏരിയ കമ്മറ്റികളുടെ അവലോകന യോഗങ്ങളിലും ജില്ലാ യോഗങ്ങളുടെ തനിയാവര്ത്തനമാണ് ഉണ്ടായത്. എത്ര ആരോപണങ്ങളും വിമര്ശനങ്ങളും ഉയര്ന്നാലും പിണറായി വിജയനെ പ്രതിപക്ഷ നേതൃസ്ഥാനത്ത് നിന്ന് മാറ്റില്ലെന്ന് എം. വി. ഗോവിന്ദന് നിലപാട് വ്യക്തമാക്കി. സംസ്ഥാന കമ്മറ്റിയും, സെക്രട്ടേറിയറ്റും ഐക്യകണ്ഠേന തെരഞ്ഞെടുത്തയാളെ മാറ്റില്ലെന്നാണ് ഗോവിന്ദന്റെ പ്രഖ്യാപനം. ഇതിനിടെയാണ് ഇടത് സഹയാത്രികരും പിണറായി മാറണമെന്ന ആവശ്യവുമായി രംഗത്തെത്തുന്നത്.
