തിരുവനന്തപുരം: ബിജെപി എംഎല്‍എമാര്‍ സത്യപ്രതിജ്ഞയ്‌ക്കായി നിയമസഭയിലേക്ക് എത്തുന്നത് പാളയം രക്തസാക്ഷി മണ്ഡപത്തിലെ പുഷ്പാര്ച്ചനയ്ക്ക് ശേഷം.
ഇന്ന് രാവിലെ 8 മണിക്ക് ബിജെപി സംസ്ഥാന ഓഫീസായ കെ.ജി. മാരാര്‍ ഭവനില്‍ നിന്ന് നിയമസഭാംഗങ്ങളായ സംസ്ഥാന അധ്യക്ഷന്‍ രാജീവ് ചന്ദ്രശേഖര്‍, വി. മുരളീധരന്‍, ബി.ബി. ഗോപകുമാര്‍ എന്നിവര്‍ ഒരുമിച്ച് സത്യപ്രതിജ്ഞാ ചടങ്ങിനിറങ്ങും. രക്തസാക്ഷി മണ്ഡപത്തിലെ പുഷ്പാര്ച്ചനയ്ക്ക് ശേഷം ബിജെപി നേതാക്കള്‍ക്കും പ്രവര്‍ത്തകര്‍ക്കുമൊപ്പം പ്രകടനമായാണ് ബിജെപി എംഎല്‍എമാര്‍ നിയമസഭയിലേക്കെത്തുന്നത്.
മുന്‍ സംസ്ഥാന അധ്യക്ഷന്‍മാരായ കുമ്മനം രാജശേഖരന്‍, പി.കെ. കൃഷ്ണദാസ്, കെ.സുരേന്ദ്രന്‍, മറ്റു സംസ്ഥാന നേതാക്കള്‍, എന്‍ഡിഎ നേതാക്കളായ ബി.ഗോപകുമാര്‍ (ട്വന്റി 20), പദ്മകുമാര്‍ (ബിഡിജെഎസ്) എന്നിവര്‍ പ്രകടനത്തിന് നേതൃത്വം നല്‍കും. സത്യപ്രതിജ്ഞാ ചടങ്ങുകള്‍ സംസ്ഥാനമെങ്ങും ബിജെപി പ്രവര്‍ത്തകര്‍ ആഘോഷപൂര്‍വം കൊണ്ടാടുമെന്ന് സംസ്ഥാന ജനറല്‍ സെക്രട്ടറി അഡ്വ. എസ്.സുരേഷ് പറഞ്ഞു.
