കൊച്ചി: എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന് പത്മഭൂഷണ്‍ നല്‍കാനുള്ള തീരുമാനത്തെ ചോദ്യം ചെയ്തുള്ള പൊതുതാല്‍പ്പര്യ ഹര്‍ജി ഹൈക്കോടതി തള്ളി. ചീഫ് ജസ്റ്റിസ് സൗമെന്‍ സെന്‍ , ജസ്റ്റിസ് ശ്യാം കുമാര്‍ വിഎം എന്നിവരടങ്ങിയ ഡിവിഷന്‍ ബെഞ്ചാണ് ഹര്‍ജി പരിഗണിച്ചത്.
ബഹുമതി നല്‍കിക്കഴിഞ്ഞ സ്ഥിതിക്ക് പുരസ്‌കാരം നല്‍കുന്നതില്‍ ഇടപെടാന്‍ ഒരു കാരണവും കാണുന്നില്ലെന്ന് കോടതി നിരീക്ഷിച്ചു. നടേശന് എതിരെ കേസുകളുണ്ടെന്ന വാദം കോടതി പരിഗണിച്ചു. എന്നാല്‍ ശിക്ഷിക്കപ്പെട്ടിട്ടില്ല. ഒരു വ്യക്തി കുറ്റക്കാരനാണെന്ന് കണ്ടെത്തിയാല്‍, ഇത്തരമൊരു ബഹുമതി റദ്ദാക്കുന്നതിന് ഇന്ത്യന്‍ യൂണിയന് ഒരു വ്യവസ്ഥയുണ്ടെന്ന് കോടതി ചൂണ്ടിക്കാട്ടി.
ശ്രീനാരായണ ധര്‍മ്മപ്രബോധന സംരക്ഷണ സമിതിയാണ് ഹര്‍ജി സമര്‍പ്പിച്ചത്. ക്രിമിനല്‍ കേസ് അടക്കം നിരവധി കേസുകളില്‍ പ്രതിയായ ഒരാള്‍ക്ക് പുരസ്‌കാരം നല്‍കുന്നത് നിയമ വിരുദ്ധമാണെന്നായിരുന്നു ഹര്‍ജിയിലെ ആരോപണം. കേസുകള്‍ പരിശോധിക്കുന്നതില്‍ കേന്ദ്ര സര്‍ക്കാറിന് വീഴ്ച പറ്റിയെന്നും പുരസ്‌കാരം നല്‍കാനുള്ള നടപടികള്‍ തടയണമെന്നുമായിരുന്നു ആവശ്യം. മാരാരിക്കുളം പോലീസ് എടുത്ത മഹേശന്‍ ആത്മഹത്യ പ്രേരണ കേസിലും മൈക്രോ ഫിനാന്‍സ് തട്ടിപ്പുകേസുകളിലും എസ്.എന്‍് ട്രസ്റ്റ് കോളേജുകളിലെ പണമിടപാട് കേസുകളിലും വെള്ളാപ്പള്ളി പ്രതിയാണെന്നും ഹര്‍ജിയില്‍ ചൂണ്ടിക്കാട്ടിയിരുന്നു. ഹര്‍ജിയില്‍ കോടതി കേന്ദ്ര സര്‍ക്കാറിന്റെ നിലപാട് തേടിയിരുന്നു.
ബഹുമതിക്കായി രൂപീകരിച്ച കമ്മിറ്റിയുടെ വിലയിരുത്തലിന്‌റെ അടിസ്ഥാനത്തില്‍ രാഷ്‌ട്രപതിയാണ് തീരുമാനം എടുക്കുന്നതെന്നും കേസുകളില്‍ ശിക്ഷിക്കപ്പെട്ടിട്ടില്ലെന്നും അത് എഫ്ഐആര്‍ ഘട്ടത്തിലാണെന്നും കേന്ദ്രസര്‍ക്കാര്‍ ചൂണ്ടിക്കാട്ടി.
