ബെംഗളൂരു: ഇന്ന് ലോകം തിരയുന്ന ചോദ്യങ്ങള്ക്കുള്ള ഉത്തരം ഭാരതത്തിന്റെ കാഴ്ചപ്പാടുകളിലുണ്ടെന്ന് ആര്എസ്എസ് സര്സംഘചാലക് ഡോ. മോഹന് ഭാഗവത്. ഭാരതീയ ശിക്ഷണ് മണ്ഡല് ആര്ട്ട് ഓഫ് ലിവിങ് ഇന്റര്നാഷണല് സെന്ററില് സംഘടിപ്പിച്ച ‘എന്.ഇ.പി 2020 നടപ്പിലാക്കല്: ഭാരതീയ ജ്ഞാന സമ്പ്രദായങ്ങളുടെ സംയോജനം’ എന്ന ത്രിദിന ദേശീയ സമ്മേളനത്തിന്റെ സമാപന പരിപാടിയില് സംസാരിക്കുകയായിരുന്നു അദ്ദേഹം.
ഭാരതത്തിന്റെ ആഗോള ഉത്തരവാദിത്തത്തെക്കുറിച്ച് അടിവരയിട്ടു പറഞ്ഞ അദ്ദേഹം, നിലവിലുള്ള ആഗോള ചട്ടക്കൂടുകള് ഭാഗികമായ വീക്ഷണങ്ങള് മാത്രമാണ് നല്കുന്നതെന്നും അവയ്ക്ക് മാത്രം ഇന്നത്തെ കാലഘട്ടത്തിലെ വെല്ലുവിളികളെ പൂര്ണമായി പരിഹരിക്കാന് കഴിയില്ലെന്നും ചൂണ്ടിക്കാട്ടി. ലോകമെമ്പാടുമുള്ള എല്ലാ ജീവജാലങ്ങളുടെയും ക്ഷേമത്തിനായി ഭാരതം പറയുന്നതു കേള്ക്കാന് ലോകം തയ്യാറാകേണ്ടത് അനിവാര്യമാണ്. ഭാരതീയ ശിക്ഷണ് മണ്ഡലിന്റെ പ്രവര്ത്തനമെന്നത് ഒരു വലിയ ദൗത്യത്തിലെ പങ്കാളിത്തമാണ്. നമ്മുടെ ദൗത്യം യഥാര്ത്ഥത്തില് ലോകത്തിന് പൂര്ണത നല്കുക എന്നതാണ്.
മറ്റ് വീക്ഷണങ്ങളെ ഭാരതം തെറ്റായി കാണുന്നില്ല. എല്ലാവരും അവരുടെ ജീവിതാനുഭവങ്ങളില് നിന്നാണ് കാഴ്ചപ്പാടുകള് രൂപീകരിക്കുന്നത്, അവയ്ക്ക് അതിന്റേതായ സാധുതയുമുണ്ട്. വൈവിധ്യങ്ങളെ ഉള്ക്കൊള്ളുന്ന ഭാരതീയദര്ശനം ഇത്തരം എല്ലാ അനുഭവങ്ങളെയും സ്വാഗതം ചെയ്യുന്നു. സത്യം എന്നത് ഏതെങ്കിലും ഒരു വീക്ഷണത്തില് മാത്രം ഒതുങ്ങാന് കഴിയാത്തത്ര വിശാലമാണ്. സത്യത്തിലേക്കുള്ളവഴി തര്ക്കമല്ല, സംവാദമാണ്.
ഭാരതീയ വീക്ഷണങ്ങള് പൂര്ണമാണ്, ഈ പൂര്ണതയ്ക്കായി ലോകം ഭാരതത്തെ കേള്ക്കേണ്ടതുണ്ട്, അദ്ദേഹം പറഞ്ഞു.
എല്ലാറ്റിനെയും പണത്തിന്റെ അടിസ്ഥാനത്തില് അളക്കുന്നതിനുമപ്പുറം, മനുഷ്യനെ അതിന്റെ സമ്പൂര്ണതയില് കാണുന്ന ഒരു സമഗ്രമായ കാഴ്ചപ്പാടിലാണ് ഭാരതീയ ശിക്ഷണ് മണ്ഡല് പ്രവര്ത്തിക്കുന്നത്. രാഷ്ട്രീയ പാര്ട്ടികളുമായി ചേര്ന്ന് ഇത്തരം പ്രവര്ത്തനങ്ങള് ശരിയായ രീതിയില് ചെയ്യാന് കഴിയില്ലെന്ന് സര്സംഘചാലക് ഓര്മ്മിപ്പിച്ചു.
ചടങ്ങില് ഡോ. മോഹന് ഭാഗവത് ഭാരതീയ ശിക്ഷണ് മണ്ഡലിന്റെ പുതിയ വെബ്സൈറ്റ് ഉദ്ഘാടനം ചെയ്തു. ശിക്ഷണ് മണ്ഡല് പ്രസിഡന്റ് ഡോ. സച്ചിദാനന്ദ് ജോഷി, ജനറല് സെക്രട്ടറി ഡോ. ഭരത്ശരണ് സിങ് തുടങ്ങിയവര് പങ്കെടുത്തു.
