ഭാരതത്തിലെ ഒരു സാധാരണ തെരുവുനായയായിരുന്നു അലോക. ഇന്ന് ലോകമെമ്പാടുമുള്ള ആയിരക്കണക്കിന് ആളുകളുടെ ഹൃദയങ്ങളില്‍ ഇടം നേടിയ ‘പീസ് ഡോഗ്’ ആണ്. സമാധാനത്തിന്റെയും കരുണയുടെയും സന്ദേശവുമായി ബുദ്ധ സംന്യാസിമാര്‍ക്കൊപ്പം ആയിരക്കണക്കിന് കിലോമീറ്ററുകള്‍ സഞ്ചരിച്ച അലോക, ഇപ്പോള്‍ തന്റെ ജന്മനാടായ ഭാരതത്തിലേക്ക് തിരിച്ചെത്തിയിരിക്കുകയാണ്. ഈ മടങ്ങിവരവ് ഒരു നായയുടെ യാത്രയുടെ മാത്രം കഥയല്ല, മറിച്ച് കരുണയുടെയും സഹവര്‍ത്തിത്വത്തിന്റെയും സന്ദേശം വീണ്ടും ഭാരത മണ്ണില്‍ മുഴങ്ങുന്നതിന്റെ തുടക്കമാണ്.
അലോകയുടെ കഥ ആരംഭിക്കുന്നത് ഭാരതത്തിലെ ഒഡീഷയുടെ തെരുവുകളില്‍ നിന്നാണ്. ഭാരതത്തിലുടനീളം 112 ദിവസത്തെ സമാധാനയാത്രക്കിടെ (വോക്ക് ഫോര്‍ പീസ്) ബുദ്ധ സംന്യാസിമാരെ അനുഗമിക്കാന്‍ തുടങ്ങിയ ഈ ‘ഇന്ത്യന്‍ പരിയാ’ നായ പിന്നീട് അവരുടെ യാത്രയുടെ ഭാഗമായി മാറി. അവര്‍ അവന് അലോക എന്നു പേര് നല്‍കി, പ്രകാശമെന്നര്‍ത്ഥം. സംന്യാസിമാര്‍ നടന്ന വഴികളിലൂടെ അവനും നടന്നു. ചൂടും മഴയും കാറ്റും താണ്ടി നൂറിലേറെ ദിവസങ്ങള്‍ അവന് അവരുടെ കൂടെ സഞ്ചരിച്ചു. യാത്രാമധ്യേ പല പ്രതിസന്ധികളും നേരിട്ടു. അതോടെ അലോക ഒരു സാധാരണ നായയില്‍ നിന്ന് സമാധാനത്തിന്റെ പ്രതീകമായി വളര്‍ന്നു.
പിന്നീട് അലോകയുടെ യാത്ര ഭാരതത്തിന്റെ അതിര്‍ത്തികള്‍ കടന്നു. അമേരിക്കയില്‍ നിന്ന് 2,300 മൈല്‍ ദൈര്‍ഘ്യമുള്ള ‘വോക്ക് ഫോര്‍ പീസ്’ യാത്രയില്‍ ബുദ്ധ സംന്യാസിമാര്‍ക്കൊപ്പം അവന് പങ്കാളിയായി. ടെക്സാസില്‍ നിന്ന് വാഷിങ്ടണ്‍ ഡി.സി. വരെ നീണ്ടുനിന്ന ഈ യാത്രയില്‍ അലോക ആയിരക്കണക്കിന് ആളുകളെ ആകര്‍ഷിച്ചു. അവന്റെ ശാന്തസ്വഭാവവും സംന്യാസിമാരോടുള്ള വിശ്വസ്തതയും ലോകമെമ്പാടുമുള്ള ജനങ്ങളെ സ്പര്‍ശിച്ചു. സമാധാനം, അഹിംസ, കരുണ എന്നീ സന്ദേശങ്ങളുടെ ജീവിക്കുന്ന പ്രതീകമായാണ് അവന് മാറിയത്. അലോകയുടെ രൂപം പോലും ആ സാത്വിക ഭാവം നിറഞ്ഞതാണ്.
ഇപ്പോള്‍ അലോക ഭാരതത്തിലേക്ക് തിരിച്ചെത്തിയപ്പോള്‍, അവനെ വരവേല്‍ക്കാന്‍ നൂറുകണക്കിന് മൃഗസ്നേഹികളും സമാധാനപ്രവര്‍ത്തകരും എത്തി. ദല്‍ഹിയിലും ഗുരുഗ്രാമിലുമുണ്ടായ സ്വീകരണ പരിപാടികള്‍ അലോകയോടുള്ള ജനങ്ങളുടെ സ്നേഹത്തിന്റെ തെളിവായി. ഭാരതത്തിന്റെ തെരുവില്‍ ജനിച്ച ഒരു നായ ലോകവേദിയില്‍ സമാധാനത്തിന്റെ സന്ദേശവാഹകനായി മാറിയെന്നത് പലര്‍ക്കും അഭിമാന നിമിഷമായി.
അലോകയുടെ യാത്ര ഇനിയും തുടരുകയാണ്. എന്നാല്‍ അവന് ഇതിനകം തന്നെ ലോകത്തിന് ഒരു പാഠം നല്‍കി കഴിഞ്ഞു: സ്നേഹത്തിനും വിശ്വസ്തതയ്‌ക്കും സമാധാനത്തിനും ഭാഷയോ അതിര്‍ത്തിയോ ഇല്ല എന്ന സന്ദേശം.
ജന്മഭൂമി ഓണ്‍ലൈന്‍