കടയ്ക്കാവൂര്: മഹാകവി കുമാരനാശാന് ജനിച്ച തൊമ്മന്വിളാകം തറവാട് നിലനിന്നിരുന്ന ഭൂമി കയ്യേറി മീന്ചന്ത തുടങ്ങാനുള്ള ശ്രമം തടയണമെന്നും വസ്തു സാംസ്കാരിക വകുപ്പ് ഏറ്റെടുത്ത് കുമാരനാശാന് ഉചിതമായ സ്മാരകം നിര്മ്മിക്കണമെന്നും ആവശ്യപ്പെട്ട് സാംസ്കാരിക വകുപ്പ് മന്ത്രിക്ക് നിവേദനം നല്കി. കുമാരനാശാന് ജന്മഭൂമി സംരക്ഷണസമിതിയാണ് മന്ത്രി പി.സി. വിഷ്ണുനാഥിന് നിവേദനം നല്കിയത്.
കുമാരനാശാനെ ശ്രീനാരായണഗുരു നേരിട്ടുവന്ന് കൂട്ടിക്കൊണ്ടുപോയ തൊമ്മന്വിളാകം തറവാട് നിലനിന്നിരുന്ന ഭാഗമാണ് സമീപത്തെ ക്രൈസ്തവ ദേവാലയ കമ്മിറ്റി കയ്യേറി മീന്ചന്ത തുടങ്ങാന് നീക്കം നടത്തുന്നത്. 1873 ഏപ്രില് 12ന് ഇവിടെയാണ് കുമാരനാശാന് ജനിച്ചത്. മഹാകവി ജനിച്ച സ്ഥലത്ത് മീന് കച്ചവടം തുടങ്ങുന്നതിനെതിരെ നാട്ടുകാരും സാംസ്കാരിക പ്രവര്ത്തകരും ശക്തമായ പ്രതിഷേധവുമായി രംഗത്തുണ്ട്.
കയ്യേറ്റക്കാരില് നിന്ന് വസ്തു മുക്തമാക്കണമെന്നും പൗരാണിക തറവാട് പുനര്നിര്മിക്കണമെന്നുമാണ് നാട്ടുകാരുടെയും സാംസ്കാരിക പ്രവര്ത്തകരുടെയും ആവശ്യം. തറ നിരപ്പാക്കി അവസാന പണികള് വരെ പൂര്ത്തിയാക്കിയെങ്കിലും നാട്ടുകാരുടെ ശക്തമായ എതിര്പ്പിനെത്തുടര്ന്ന് ഇതുവരെ ചന്ത പ്രവര്ത്തിച്ചു തുടങ്ങാനായില്ല. ഇതിനിടെ ചന്തതുടങ്ങുന്നതിനെ എതിര്ക്കുന്ന നാട്ടുകാര്ക്കെതിരെ ഇടവക കമ്മിറ്റിയില്പ്പെട്ട ചിലര് ഭീഷണിഉയര്ത്തുന്നതായും പരാതി ഉയര്ന്നിട്ടുണ്ട്.
