കൊച്ചി: പ്രതിപക്ഷ നേതാവ് പിണറായി വിജയന്റെ തിരുവനന്തപുരത്തെ വാടക വീട്ടില് പരിശോധന നടത്തിയ ഉദ്യോഗസ്ഥരെ സി പി എം പ്രവര്ത്തകര് ആക്രമിച്ച സംഭവത്തിലെ ഒമ്പതാം പ്രതിക്ക് ജാമ്യം നല്കിയത് റദ്ദാക്കാന് ഇ ഡി ഹൈക്കോടതിയില്. കടകംപളളി സ്വദേശി എസ്എഫ്ഐ നേതാവ് ഹരീഷ്കുമാറിനാണ് പ്രോസിക്യൂട്ടറുടെ പ്രത്യേക താത്പര്യത്തില് ജാമ്യം ലഭിച്ചത്.പൊലീസ് എതിര്ത്തിട്ടുണ്ടെങ്കിലും ജാമ്യം നല്കുന്നത് കേസിനെ ബാധിക്കില്ലെന്നും അന്വേഷണം ഏകദേശം പൂര്ത്തിയായെന്നുമാണ് തിരുവനന്തപുരം പ്രിന്സിപ്പില് സെഷന്സ് കോടതിയില് പ്രോസിക്യൂട്ടര് ഗീനാകുമാരി വാദിച്ചത്.
പ്രതിയ്ക്ക് ജാമ്യം നല്കുന്നതില് പൊലീസിന്റെ നിര്ദ്ദേശത്തിന് വിരുദ്ധമായിട്ടാണ് പ്രോസിക്യൂട്ടര് കോടതിയില് നിലപാട് അറിയിച്ചത്. ജാമ്യം നല്കുന്നതിന് എതിര്ക്കാതിരുന്ന പ്രോസിക്യൂട്ടറുടെ നിലപാട് സംശയാസ്പദമാണെന്ന് ഇ ഡി ഹര്ജിയില് പറയുന്നു. ഇതിനെതിരെ കേസില് കക്ഷി ചേരാന് ഇഡി കഴിഞ്ഞ ദിവസം അപേക്ഷ നല്കിയിരുന്നു.തുടര്ന്ന് അടുത്ത 24 മണിക്കൂറിനുള്ളിലാണ് ജാമ്യം റദ്ദാക്കാന് ഇഡിയുടെ അടുത്ത നീക്കം.
ഉദ്യോഗസ്ഥരെ ആക്രമിച്ച് ഭീകരാന്തരീക്ഷമുണ്ടാക്കിയ പ്രതിയ്ക്ക് കീഴ്ക്കോടതി നല്കിയ ജാമ്യം പൊതുതാല്പര്യത്തിന് എതിരാണെന്ന് ഇഡി ചൂണ്ടിക്കാട്ടി. പ്രതിക്ക് ജാമ്യം ലഭിക്കുന്നത് കേസിനെ പ്രതികൂലമായി ബാധിക്കും. ഉദ്യോഗസ്ഥരെ ആക്രമിച്ചതിന് പിന്നിലെ ഗൂഢാലോചനക്കാര് സിപിഎം നേതാക്കളാണെന്നും അതിനാല് പ്രതിയുടെ ജാമ്യം ഗൂഢാലോചന നടത്തിയവരെ പിടികൂടുന്നതിന് തടസമാകുമെന്നും ചൂണ്ടിക്കാണിച്ചാണ് ഇഡി ഹൈക്കോടതിയെ സമീപിച്ചിട്ടുളളത്.
ജാമ്യം അനുവദിച്ച പ്രിന്സിപ്പല് സെഷന്സ് കോടതിയില് കഴിഞ്ഞ 18 ന് എന്തു കൊണ്ട് ജാമ്യം അനുവദിക്കരുതെന്നതിന് 13 കാര്യങ്ങള് വിശദീകരിച്ചുകൊണ്ട് പൊലീസ് വിശദ റിപ്പോര്ട്ട് കോടതിക്ക് നല്കിയിരുന്നു. എന്നാല് 24 ന് വാദം നടന്നപ്പോള് പൊലീസ് റിപ്പോര്ട്ടിന് വിരുദ്ധമായി ഇനി കസ്റ്റഡിയില് വേണ്ടെന്ന് പ്രോസിക്യൂട്ടര് ഗീന കുമാരി പറഞ്ഞു.ഇതേ തുടര്ന്നാണ് ഹരീഷ് കുമാറിന് ജാമ്യം ലഭിച്ചത്. പിണറായി സര്ക്കാര് നിയമിച്ച ഗീന കുമാരി മുമ്പ് എസ് എഫ് ഐ സംസ്ഥാന വൈസ് പ്രസിഡന്റായിരുന്നു.
