സാന്റാ ക്ലാര: തുടര്ന്നുകൊണ്ടിരിക്കുന്ന ലോകകപ്പ് ഫുട്ബോള് ഗ്രൂപ്പ് ഘട്ടത്തിലെ നിര്ണായകമായ അവസാന റൗണ്ട് മത്സരത്തില് സമനിലതെറ്റാതെ ഓസ്ട്രേലിയ നോക്കൗട്ട് ബെര്ത്ത് ഉറപ്പിച്ചു. ലാറ്റിനമേരിക്കന് ടീം പാരഗ്വെയെ ആണ് സമനിലയില് തളച്ചത്. മത്സര ഫലം ഗോളില്ലാതെ കലാശിച്ചെങ്കിലും വിജയതുല്യമായ പ്രകടനത്തിലൂടെയാണ് ഓസ്ട്രേലിയ കളം പിടിച്ചത്. മത്സരത്തില് ഗോള് പിറന്നില്ലെന്ന് മാത്രം.
മുന് മത്സരങ്ങളിലെ ഒരു ജയവും ഒരു തോല്വിയും എന്ന കണക്കില് മൂന്ന് പോയിന്റുമായാണ് ഇരു ടീമും സാന്റാ ക്ലാരയില് കൊമ്പുകോര്ക്കാനിറങ്ങിയത്. മത്സരം സമാസമം പിരിഞ്ഞാല് പോലും ഓസ്ട്രേലിയ നാല് പോയിന്റിനൊപ്പം ഗോള് വ്യത്യാസത്തിന്റെ കൂടി മികവില് നോക്കൗട്ട് ഉറപ്പിക്കാന് സാധിക്കുമായിരുന്നു. എന്നിട്ടും സമനിലയ്ക്കു വേണ്ടി താളംതല്ലി നില്ക്കുന്ന ഓസ്ട്രേലിയന് ടീമിനെയല്ല കണ്ടത്. ജയിക്കാനായി പൊരുതുന്ന നിരയ്ക്ക് മുന്നില് പാരഗ്വെ പകച്ചു. രണ്ട് പകുതികളിലും ഗോളെന്നുറച്ച ഏതാനും മുന്നേറ്റങ്ങള് നടത്തുക മാത്രമായിരുന്നില്ല ഓസ്ട്രേലിയ ചെയ്തത്, പന്തിന്റെ പൊസ്സെഷന് കാത്തപ്പോഴെല്ലാം പാരഗ്വെ നെഞ്ചകം പിടഞ്ഞു. അത്രയ്ക്ക് ഭീതിജനകമായ മുന്നേറ്റങ്ങളാണ് നടത്തിക്കൊണ്ടിരുന്നത്. കളിയുടെ സമസ്ത മേഖലയിലും ഓസ്ട്രേലിയ നിറഞ്ഞു നിന്നു. ഗോളിലേക്കൊരു നല്ല ഓണ്ടാര്ഗറ്റ് ഇല്ലാതെയാണ് മത്സരം പിരിഞ്ഞത് എന്നത് മാത്രം കളിയിലെ വലിയ പോരായ്മയായി.
ഗ്രൂപ്പ് ഡിയില് നാല് പോയിന്റോടെ ഓസ്ട്രേലിയ അമേരിക്കയ്ക്ക് പിന്നില് രണ്ടാം സ്ഥാനക്കാരായി നോക്കൗട്ട് ഉറപ്പിച്ചു. നാല് പോയിന്റ് നേടിയെങ്കിലും പാരഗ്വെ ഗോള് വ്യത്യാസത്തില് ഓസ്ട്രേലിയയെക്കാള് പിന്നിലാകുകയായിരുന്നു.
