മുംബൈ : മഹാരാഷ്ട്ര നിയമസഭയുടെ മൺസൂൺ സെഷനിൽ എൻസിപി (അജിത് പവാർ വിഭാഗം) എംഎൽഎ സന മാലിക് നടത്തിയ പ്രസ്താവനയെച്ചൊല്ലി വിവാദം . സഭയിൽ നടന്ന ചർച്ചയ്ക്കിടെ, ഇന്ത്യയിലും ഖുറാനെ അടിസ്ഥാനമാക്കിയുള്ള നിയമങ്ങൾ നടപ്പിലാക്കണമെന്നാണ് സന ആവശ്യപ്പെട്ടത്. മുത്തലാഖ് , , ബഹുഭാര്യത്വം തുടങ്ങിയ വിഷയങ്ങൾ പരാമർശിക്കുമ്പോൾ സന മാലിക് പാകിസ്ഥാനെയാണ് ഉദാഹരണമായി ചൂണ്ടിക്കാണിച്ചത്.
പാകിസ്ഥാന് ഖുർആനിന്റെ നിയമങ്ങൾ നിയമമായി സ്വീകരിക്കാൻ കഴിയുമെങ്കിൽ, ഇന്ത്യയും അത് ചെയ്യണമെന്നാണ് സന മാലികിന്റെ നിലപാട്. ഇതിന് പിന്നാലെ വൻ വിമർശനം ഉയർന്നു. 2024 ൽ മുംബൈയിലെ അനുശക്തി നഗർ മണ്ഡലത്തിൽ നിന്ന് ആദ്യമായി എംഎൽഎയായി തിരഞ്ഞെടുക്കപ്പെട്ട വനിതയാണ് സന . മുതിർന്ന നേതാവും മുൻ സംസ്ഥാന മന്ത്രിയുമായ നവാബ് മാലിക്കിന്റെ മകളാണ് അവർ. നവാബ് മാലിക് ഉത്തർപ്രദേശിൽ നിന്നുള്ളയാളാണ്, പിന്നീട് മുംബൈയിലേക്ക് താമസം മാറി, അവിടെ അദ്ദേഹം രാഷ്ട്രീയത്തിൽ സജീവമായി.
രാഷ്ട്രീയത്തിൽ പ്രവേശിക്കുന്നതിന് മുമ്പ് സന മാലിക് ആർക്കിടെക്റ്റായും അഭിഭാഷകയായും പ്രവർത്തിച്ചിരുന്നു. 2024 ലെ തിരഞ്ഞെടുപ്പിൽ, നവാബ് മാലിക് തന്റെ മകൾ സനയെ സ്ഥാനാർത്ഥിയായി നിർത്തി. നിയമസഭാ സമ്മേളനത്തിനിടെ, ബിജെപി എംഎൽഎ ദേവയാനി ഫരാന്ദെ മുത്തലാഖ് നിയമം കർശനമായി നടപ്പിലാക്കുന്നതിനെക്കുറിച്ചുള്ള വിഷയം ഉന്നയിച്ചു. മുസ്ലീം സ്ത്രീകൾ ഇപ്പോഴും പീഡനങ്ങൾ നേരിടുന്നുണ്ടെന്ന് അവർ സഭയെ അറിയിച്ചു.
പാകിസ്ഥാനിൽ, രണ്ടാം വിവാഹത്തിന് ആദ്യ ഭാര്യയുടെ രേഖാമൂലമുള്ള സമ്മതവും കൗൺസിലിന്റെ അംഗീകാരവും ആവശ്യമാണെന്ന് അവർ ചൂണ്ടിക്കാട്ടി. ഈ കർശനമായ നിയമം കാരണം, പാകിസ്ഥാനിൽ ബഹുഭാര്യത്വത്തിന്റെ നിരക്ക് ഒരു ശതമാനം മാത്രമാണ്. മഹാരാഷ്ട്രയിൽ സമാനമായ കർശനമായ നിയമങ്ങളും ഏകീകൃത സിവിൽ കോഡും (യുസിസി) കൊണ്ടുവരണമെന്ന് അവർ ആവശ്യപ്പെട്ടു.
ബിജെപി എംഎൽഎയുടെ പ്രസ്താവനയ്ക്കെതിരെയാണ് സന രംഗത്തെത്തിയത്. ബഹുഭാര്യത്വം മുസ്ലീം സമൂഹത്തിന് മാത്രമുള്ളതല്ലെന്നും എല്ലാ മതങ്ങളിലും നിലനിൽക്കുന്നുണ്ടെന്നും അവർ വാദിച്ചു. പാകിസ്ഥാൻ പുതുതായി ഒന്നും ചെയ്തിട്ടില്ലെന്നും ഖുർആനിൽ നിർദ്ദേശിച്ചിരിക്കുന്ന മുസ്ലീം വ്യക്തിനിയമം നിയമമാക്കി ക്രോഡീകരിക്കുക മാത്രമാണ് ചെയ്തതെന്നും സന മാലിക് പറഞ്ഞു.
“ഇസ്ലാമിൽ, ഞങ്ങൾ ഖുർആനിന്റെ പഠിപ്പിക്കലുകൾ പാലിക്കുന്നു. പാകിസ്ഥാന് ഇത് നടപ്പിലാക്കാൻ കഴിയുമെങ്കിൽ, ഇന്ത്യയും ഖുറാനെ അടിസ്ഥാനമാക്കിയുള്ള നിയമങ്ങൾ കൊണ്ടുവരണം; ഞങ്ങൾ അത് ആവശ്യപ്പെടുന്നു” എന്നും സന മാലിക് കൂട്ടിച്ചേർത്തു.സന മാലിക്കിന്റെ പ്രസ്താവനയെ ബിജെപി എംഎൽഎ അതുൽ ഭട്ഖൽക്കർ സഭയിൽ ശക്തമായി എതിർത്തു. ഏതെങ്കിലും മതഗ്രന്ഥമോ ഖുർആനോ അല്ല, ഇന്ത്യൻ ഭരണഘടനയാണ് ഈ രാജ്യത്തെ നയിക്കുന്നത് . പാകിസ്ഥാനോ ശരീഅത്ത് നിയമത്തിനോ വേണ്ടി വാദിക്കാൻ സഭയിൽ സ്ഥാനമില്ലെന്നും അദ്ദേഹം വ്യക്തമാക്കി.
സന മാലിക് ഒരു ഹിന്ദു ഭൂരിപക്ഷ രാഷ്ട്രത്തിലാണെന്ന് മറന്നുപോയി. ഇന്ത്യൻ നിയമം ഇഷ്ടപ്പെടാത്തവരും ശരിയ നിയമം വേണമെന്ന് നിർബന്ധം പിടിക്കുന്നവരുമാണെങ്കിൽ, അവർ തങ്ങളുടെ സ്ഥാനം രാജിവച്ച് പാകിസ്ഥാനിലേക്ക് മാറണമെന്നുമാണ് മഹാരാഷ്ട്ര മന്ത്രിയും ബിജെപി നേതാവുമായ നിതേഷ് റാണെ പറയുന്നത്.
