സാന്റ ക്ലാര: ലോകകപ്പ് ഫുട്ബോളില് ആദ്യ വിജയം മോഹിച്ചിറങ്ങിയ ജോര്ദാനെ അള്ജീരിയ കീഴടക്കി. ഗ്രൂപ്പ് ജെയിലെ മത്സരത്തില് 2-1ന് അള്ജീരിയ വിജയിച്ചു. ഇതോടെ ജോര്ദാന് ലോകകപ്പില്നിന്നു പുറത്തായി. ആദ്യ പകുതിയില് ലീഡ് നേടിക്കൊണ്ട് ജോര്ദാന് പ്രതീക്ഷകള്ക്ക് ചിരി വിടര്ന്നതാണ്. പക്ഷെ രണ്ടാം പകുതിയില് കിട്ടിയ രണ്ട് കോര്ണര് കിക്കുകള് ഫലത്തിലെത്തിച്ച് അള്ജീരിയ വിജയവും നോക്കൗട്ട് പ്രതീക്ഷയും സജീവമാക്കി. 36-ാം മിനിറ്റില് മികച്ചൊരു ഷോട്ടിലൂടെ ജോര്ദാന് വേണ്ടി നിസാര് അല്-റഷ്ദാന് ആണ് ലീഡ് ചെയ്തത്. 69-ാം മിനിറ്റില് നാദിര് ബെന്ബോലി അള്ജീരിയക്കായി സമനില കണ്ടെത്തി. കോര്ണര് കിക്കില് നിന്നാണ് സ്കോര് ചെയ്തത്. 82-ാം മിനിറ്റില് മറ്റൊരു കോര്ണര് കിക്കില് നിന്ന് അമിനെ ഗോയൂറി അള്ജീരിയയുടെ വിജയ ഗോളും നേടി.
ശനിയാഴ്ച്ച (ഭാരത സമയം ഞായര് രാവിലെ 7.30)യാണ് അള്ജീരിയുടെ അവസാന ഗ്രൂപ്പ് പോരാട്ടം. ഓസ്ട്രിയയ്ക്കെതിരായ ഈ മത്സരത്തില് ജയിക്കാനായാല് നോക്കൗട്ടില് പ്രവേശിക്കാനാകും.
