ബെംഗളൂരു: മകന് സ്‌കൂള്‍ അഡ്മിഷന്‍ തേടിയ വീട്ടമ്മയോട് വീഡിയോ കോളില്‍ നഗ്‌നയായി വരാന്‍ നിര്‍ബന്ധിച്ചുവെന്ന കേസില്‍ മുന്‍ എംപി പ്രജ്വല്‍ രേവണ്ണ സമര്‍പ്പിച്ച ജാമ്യാപേക്ഷയില്‍ കര്‍ണാടക ഹൈക്കോടതി എസ്ഐടിയുടെ റിപ്പോര്‍ട്ടു തേടി. കേസ് ജൂലായ് 3 ന് പരിഗണിക്കാന്‍ മാറ്റി.
മുന്‍ പ്രധാനമന്ത്രി എച്ച്.ഡി.ദേവഗൗഡയുടെ ചെറുമകനാണ് പ്രജ്വല്‍ രേവണ്ണ. വീട്ടുജോലിക്കാരിയെ നിരന്തരം ബലാത്സംഗം ചെയ്യുകയും ആ ദൃശ്യങ്ങള്‍ വീഡിയോയില്‍ പകര്‍ത്തുകയും ചെയ്ത കേസില്‍ ജീവപര്യന്തം തടവിന് ശിക്ഷിക്കപ്പെട്ട് നിലവില്‍ ജയിലിലാണ് പ്രജ്വല്‍.
പരാതിക്കാരിയായ വീട്ടമ്മ 2019 ല്‍ തന്റെ മകന് എംപി ക്വാട്ടയില്‍ കേന്ദ്രീയ വിദ്യാലയത്തില്‍ പ്രവേശനത്തിന് സഹായിക്കണമെന്ന് ആവശ്യപ്പെട്ട് പ്രജ്വല്‍ രേവണ്ണയെ സമീപിച്ചിരുന്നു. അവരുടെ മൊബൈല്‍ നമ്പര്‍ വാങ്ങിയ ശേഷം, വീഡിയോ കോളുകള്‍ വിളിക്കുകയും വസ്ത്രങ്ങള്‍ അഴിച്ചുമാറ്റി ഫോണ്‍ ക്യാമറയ്‌ക്ക് മുന്നില്‍ നഗ്‌നത കാണിക്കാന്‍ ആവശ്യപ്പെടുകയും ചെയ്തുവെന്നാണ് കേസ്. ഈ വീഡിയോകള്‍ റെക്കോര്‍ഡ് ചെയ്ത ശേഷം അവ പ്രചരിപ്പിക്കുമെന്ന് ഭീഷണിപ്പെടുത്തിയെന്നും പരാതിയില്‍ പറയുന്നു.
