തിരുവനന്തപുരം: സംസ്ഥാനത്തെ രൂക്ഷമായ തൊഴിലില്ലായ്മയ്ക്കും, സാധാരണക്കാരുടെ ജീവിത പ്രതിസന്ധികള്ക്കും യാതൊരു പരിഹാരവും നിര്ദേശിക്കാത്ത ബജറ്റാണ് യുഡിഎഫ് സര്ക്കാര് അവതരിപ്പിച്ചതെന്ന് ബിജെപി മുന് സംസ്ഥാന അധ്യക്ഷന് കെ. സുരേന്ദ്രന്.
തിരഞ്ഞെടുപ്പ് സമയത്ത് യുഡിഎഫ് ജനങ്ങള്ക്ക് മുന്നില് അവതരിപ്പിച്ച ‘ഇന്ദിരാ ഗ്യാരണ്ടി’കളില് പ്രധാനപ്പെട്ട കോളേജ് വിദ്യാര്ത്ഥിനികള്ക്ക് പ്രതിമാസം 1000 രൂപ ധനസഹായവും, യുവാക്കള്ക്ക് അഞ്ച് ലക്ഷം രൂപ വരെ ഈടില്ലാ വായ്പയും ബജറ്റില് എവിടെയാണെന്ന് സര്ക്കാര് വ്യക്തമാക്കണം. യുവജനങ്ങളുടെ പ്രതീക്ഷകള്ക്ക് നേരെയുള്ള വഞ്ചനയാണ് ഈ ബജറ്റ്.
സംസ്ഥാനത്ത് തൊഴിലില്ലായ്മ നിരക്ക് വര്ധിച്ചുകൊണ്ടിരിക്കുമ്പോഴും തൊഴില് സൃഷ്ടിക്കാനോ, നിക്ഷേപം ആകര്ഷിക്കാനോ വ്യക്തമായ പദ്ധതികളോ കാഴ്ചപ്പാടോ ബജറ്റില് ഇല്ല.കേരളത്തിലെ യുവതലമുറയുടെ ഭാവിയെക്കുറിച്ച് യാതൊരു കരുതലുമില്ലാത്ത സമീപനമാണ് സര്ക്കാര് സ്വീകരിച്ചിരിക്കുന്നത്.
പുതിയൊരു കേരളം സൃഷ്ടിക്കുമെന്ന അവകാശവാദങ്ങള്ക്കപ്പുറം മുങ്ങിത്താഴുന്ന കേരളത്തിന്റെ ചിത്രമാണ് ഈ ബജറ്റ് നല്കുന്നത്. പ്രതിപക്ഷ നേതാവിന്റെ കസേരയില് നിന്ന് മുഖ്യമന്ത്രിയുടെ കസേരയിലേക്ക് വി.ഡി. സതീശന് മാറുന്നതും, മുഖ്യമന്ത്രിയുടെ കസേരയില് നിന്ന് പിണറായി വിജയന് പ്രതിപക്ഷ നേതാവിന്റെ കസേരയിലേക്ക് മാറുന്നതുമല്ലാതെ, കേരളത്തിന് ഒരു മാറ്റവും ലഭിക്കില്ലെന്ന് ഈ ബജറ്റ് തെളിയിക്കുന്നു.
അഞ്ച് ലക്ഷം കോടിയോളം രൂപയുടെ കടബാധ്യതയുള്ള കേരളത്തെ കടക്കെണിയില് നിന്ന് രക്ഷിക്കാന് എന്തെങ്കിലും വ്യക്തമായ റോഡ്മാപ്പ് പ്രഖ്യാപിച്ചിട്ടില്ല. സാമ്പത്തിക പ്രതിസന്ധി പരിഹരിക്കുന്നതിനുപകരം പുതിയ വാഗ്ദാനങ്ങളുടെ മറവില് ജനങ്ങളെ തെറ്റിദ്ധരിപ്പിക്കുകയാണ് യുഡിഎഫ് സര്ക്കാര്.
സ്ത്രീകള്ക്ക് കെഎസ്ആര്ടിസിയില് സൗജന്യ യാത്ര വാഗ്ദാനം ചെയ്ത സര്ക്കാര് പിന്നീട് അത് 6000 ബസുകളില് നിന്ന് 3000 ബസുകളിലേക്ക് ചുരുക്കി. ഇപ്പോള് പ്രഖ്യാപിച്ച 25 ലക്ഷം രൂപയുടെ ഇന്ഷുറന്സ് പദ്ധതിക്കായി ബജറ്റില് മാറ്റിവെച്ചിരിക്കുന്നത് വെറും 10 കോടി രൂപ മാത്രമാണ്. ഇത് സ്ത്രീകളെ സഹായിക്കാനുള്ള പദ്ധതിയല്ല, മറിച്ച് സ്വകാര്യ ഇന്ഷുറന്സ് കമ്പനികള്ക്ക് പ്രയോജനം ലഭിക്കുന്ന തരത്തിലുള്ള മറ്റൊരു തട്ടിപ്പാണ്.
കേന്ദ്ര സര്ക്കാരിന്റെ ആയുഷ്മാന് ഭാരത് പദ്ധതിയുടെ ഭാഗമായി മുതിര്ന്ന പൗരന്മാര്ക്ക് 10 ലക്ഷം രൂപ വരെ സൗജന്യ ചികിത്സ ലഭ്യമാക്കുന്ന വായോവന്ദന പദ്ധതിയുടെ ആനുകൂല്യം കേരളത്തിലെ ലക്ഷക്കണക്കിന് ആളുകള്ക്ക് ലഭിക്കാമായിരുന്നു. എന്നാല് പിണറായി വിജയന് സര്ക്കാര് ആ പദ്ധതിയുമായി ബന്ധപ്പെട്ട കരാറില് ഒപ്പുവെക്കാതിരുന്നതിനാല് സംസ്ഥാനത്തെ ജനങ്ങള്ക്ക് ആ ആനുകൂല്യം നിഷേധിക്കപ്പെട്ടു.
സാധാരണക്കാരുടെ ജീവിത പ്രശ്നങ്ങള് പരിഹരിക്കാനും യുവാക്കള്ക്ക് പ്രതീക്ഷ നല്കാനും സംസ്ഥാനത്തിന്റെ സാമ്പത്തിക പ്രതിസന്ധിക്ക് പരിഹാരം കണ്ടെത്താനും ഈ ബജറ്റില് ഒന്നുമില്ല. ജനങ്ങളുടെ പ്രതീക്ഷകളെ തകര്ത്ത ബജറ്റായാണ് ഇത് ചരിത്രത്തില് രേഖപ്പെടുത്തപ്പെടുകയെന്ന് കെ. സുരേന്ദ്രന് പറഞ്ഞു.
