ബെംഗളൂരുവിലെ റെസ്റ്റോറന്‍റില്‍ നിന്നും മൈക്രോഗ്രീന്‍ കഴിച്ചു, പിന്നെ അജയ് ഗോപിനാഥിന്റെ ജീവിതം മാറി മറിഞ്ഞു, ഇന്ന് ലക്ഷങ്ങള്‍ സമ്പാദിക്കുന്നു

ബെംഗളൂരു: ബെംഗളൂരുവിലെ റെസ്റ്റോറന്‍റില്‍ നിന്നും ഒരു ദിവസം അജയ് ഗോപിനാഥ്‌ ഒരു സാധാരണ ബാങ്ക് ഉദ്യോഗസ്ഥൻ കഴിച്ചത് വിചിത്രമായ ഭക്ഷണമായിരുന്നു. പേര് മൈക്രോ ഗ്രീന്‍. എന്തെന്നല്ലേ? സാധാരണ മുളച്ചു കഴിഞ്ഞാൽ പരമാവധി മൂന്ന് ആഴ്ചക്കുള്ളിൽ വിളവെടുക്കുന്ന പച്ചക്കറി ചെടികളാണ് ഈ ഭക്ഷണത്തില്‍ മുഖ്യം. ഭക്ഷണം അജയ് ഗോപിനാഥിനെ ആകര്‍ഷിച്ചു. 2017ലാണ് ഈ സംഭവം. അത് അദ്ദേഹത്തിന്റെ ജീവിതം മാറ്റിമറിച്ചു.

ഈ കൃഷി ഇഷ്ടപ്പെട്ട അജയ് തന്റെ 14 വർഷം നീണ്ട സിറ്റിബാങ്കിലേ ജോലി രാജി വച്ചതിനു ശേഷം ഒരു മൈക്രോഗ്രീന്‍ സംരംഭകൻ ആയി മാറി. പച്ചക്കറിച്ചെടികളുടെ ആദ്യത്തെ ഇലകൾ തളിർക്കുമ്പോൾ തന്നെ വിളവെടുത്താൽ അവയിൽ മിനറൽസ്, വിറ്റാമിൻ ഒക്കെ ധാരാളം ഉണ്ടാവുമെന്ന് പറയുന്നു. ഇതാണ് മൈക്രോഗ്രീന്‍സ്.

അദ്ദേഹം ആദ്യം ചെയ്തത് തന്റെ വീട്ടിൽ തന്നെ ചെറിയ രീതിയിൽ കൃഷി ചെയ്ത് പരീക്ഷിക്കുകയായിരുന്നു, അതിനായി അദ്ദേഹം ഓൺലൈൻ ആയി ഒരുപാട് ട്യൂട്ടോറിയൽ വീഡിയോകളെ ആശ്രയിച്ചു. എന്നാൽ ആ ശ്രമങ്ങൾ ഒന്നും വിജയം കണ്ടില്ല. ഒടുവില്‍ ബ്രിട്ടനില്‍ നിന്നുള്ള ഒരു വിദഗ്ധനെ കിട്ടി. ഇയാളുടെ സഹായത്തോടെ അയാൾ നൽകിയ വിത്തുകൾ ഉപയോഗിച്ച് അജയ് ആദ്യത്തെ വിളവെടുപ്പ് നടത്തി. വെറും രണ്ട് ട്രേയിൽ മുളപ്പിച്ച ചെടികൾ തന്റെ കുടുംബക്കാർക്കും സുഹൃത്തുക്കൾക്കും നൽകിയായിരുന്നു തുടക്കം. അതിൽ നിന്ന് ലഭിച്ച ഫീഡ്ബാക്ക് ഉൾപ്പെടെ പരിശോധിച്ച് വീണ്ടും വീണ്ടും കൃഷി ചെയ്തു.

പിന്നീട് അഞ്ച് ലക്ഷം മുടക്കി ഗ്രോ ഗ്രീന്‍സ് (Grow greens) എന്ന പേരിൽ ഒരു സ്ഥാപനം ആരംഭിച്ചു. ഏതാണ്ട് 15 ഇനത്തിൽ പെട്ട മൈക്രോ ഗ്രീന്‍സ് ഉല്‍പാദിപ്പിച്ചു. ഇവയെല്ലാം ആരോഗ്യത്തിന് പ്രാധാന്യം നല്‍കുന്ന ജിമ്മിലും, ആശുപത്രികളിലും കൊടുത്തു. ക്രമേണ മറ്റുള്ളവരിലേക്കും ഷോപ്പുകളിലേക്കും വിപണനം വ്യാപിപ്പിച്ചു.

എന്തായാലും ഒരു ചെറിയ മുറിയിൽ തുടങ്ങിയ ഈ കൊച്ചു സംരംഭം വെറും മാസങ്ങൾ കൊണ്ട് വളർന്നു, തുടക്ക കാലത്ത് 20000 രൂപയായിരുന്ന വരുമാനം ഇന്നിപ്പോൾ പ്രതിമാസം മൂന്നര ലക്ഷം രൂപയിൽ എത്തി നിൽക്കുന്നു.

എന്താണ് ബെംഗളൂരു റെസ്റ്റോറന്‍റുകളില്‍ തരംഗമായ മൈക്രോഗ്രീന്‍സ് കറി?

മൈക്രോഗ്രീൻസ് കറികൾ പോഷകസമൃദ്ധവും, ഊർജ്ജസ്വലവും, വേഗത്തിൽ തയ്യാറാക്കാൻ കഴിയുന്നതുമാണ്. മൈക്രോഗ്രീൻസ് അതിലോലമായതിനാൽ, ഉയർന്ന ചൂടിൽ പോഷകങ്ങൾ നഷ്ടപ്പെടുന്നതിനാൽ റഫ്രിജറേറ്ററില്‍ ആണ് സൂക്ഷിക്കുക.ഇത് സാധാരണ പയർ അല്ലെങ്കിൽ തക്കാളി എന്നിവ ചേര്‍ത്ത് ഉണ്ടാക്കാം. തക്കാളിയും ഉള്ളിയും എല്ലാം ചേര്‍ത്തുണ്ടാക്കുന്ന കറിയില്‍ ഒടുവില്‍ മൈക്രോഗ്രീന്‍ ചേര്‍ക്കും. ബേസ് ആയി തയ്യാറാക്കുന്ന കറിയില്‍ വിളമ്പുന്നതിന് തൊട്ടുമുമ്പോ പാചകത്തിന്റെ ഏറ്റവും ഒടുവിലോ ആണ് മൈക്രോഗ്രീൻസ്ഇട്ട് ഇളക്കുക. ഇതോടെ മൈക്രോഗ്രീന്‍സ് കറിയായി. ഇത് പച്ചയ്‌ക്ക് പറിച്ച് നേരിട്ടും കഴിയ്‌ക്കാം.