കൊച്ചി : വിഴിഞ്ഞം തുറമുഖവുമായി ബന്ധപ്പെട്ട് 300 കോടി രൂപയുടെ കരാര് ലഭിച്ചെന്ന് കാട്ടി തട്ടിപ്പ് നടത്തിയ കേസില് മുഖ്യപ്രതി സല്മാനുല് ഫാരിസ് പിടിയില്.കൊച്ചിയിലെ വാടക വീട്ടില് നിന്നുമാണ് ഇയാളെ പിടികൂടിയത്.
കേസില് കൊച്ചി സ്വദേശിനിയെയും തമ്പാനൂര് പൊലീസ് ചോദ്യം ചെയ്യുകയാണ്.കൊച്ചി കേന്ദ്രീകരിച്ച് അന്വേഷണം വ്യാപിപ്പിക്കും.പ്രതി സല്മാനുല് ഫാരിസ് വിഴിഞ്ഞം തുറമുഖത്തിന്റെ പേരില് വ്യാജ രേഖയുണ്ടാക്കി യുവതിക്ക് അയച്ചിരുന്നു.
മലപ്പുറം സ്വദേശിയാണ് സല്മാനുല് ഫാരിസ്. വിഴിഞ്ഞം തുറമുഖം (വിഐഎസ്എല്) ചീഫ് എക്സിക്യൂട്ടീവ് ഓഫീസര് നല്കിയ പരാതി പ്രകാരമാണ് തിരുവനന്തപുരം തമ്പാനൂര് പൊലീസ് കേസ് രജിസ്റ്റര് ചെയ്തത്.
വിഐഎസ്എലില് നിന്ന് 300കോടി രൂപയുടെ ടെന്ഡര് തനിക്ക് ലഭിച്ചതായി അവകാശപ്പെടുന്ന വ്യാജ രേഖ പ്രതി നിര്മ്മിച്ചു. വിഐഎസ്എല് മുതിര്ന്ന ഉദ്യോഗസ്ഥരുടെ ഒപ്പുകളും ഈ രേഖയില് വ്യാജമായി പതിച്ചിരുന്നു. ഈ രേഖ ഉപയോഗിച്ച് ആളുകളെ വഞ്ചിക്കാനും അവരില് നിന്ന് നിക്ഷേപം നേടാനും ശ്രമിക്കുന്നതായി വിവരം ലഭിച്ചതിനെത്തുടര്ന്ന് വിഴിഞ്ഞം തുറമുഖ അധികൃതര് പൊലീസില് പരാതി നല്കുകയായിരുന്നു.
വഞ്ചിക്കപ്പെട്ടവരില് നിന്നും പൊലീസ് വിവരങ്ങള് ശേഖരിച്ചിട്ടുണ്ട്.
