അറ്റ്ലാന്റ: ഇന്ന് രാത്രി 9.30ന് നടക്കുന്ന ഗ്രൂപ്പ് എയിലെ ദക്ഷിണാഫ്രിക്ക-ചെക്ക് റിപ്പബ്ലിക് പോരാട്ടത്തിലൂടെ ലോകകപ്പ് ഫുട്ബോള് 2026 ഗ്രൂപ്പ് ഘട്ടത്തിന്റെ രണ്ടാം റൗണ്ട് മത്സരങ്ങള് ആരംഭിക്കും. ഇതേ ഗ്രൂപ്പിലെ മറ്റൊരു രണ്ടാം റൗണ്ട് മത്സരത്തില് നാളെ പുലര്ച്ചെ 6.30ന് മെക്സിക്കോയും ദക്ഷിണ കൊറിയയും ഏറ്റുമുട്ടും. ഈ രണ്ട് മത്സരങ്ങള്ക്കുമിടയില് ഗ്രൂപ്പ് ബി രണ്ടാം റൗണ്ട് മത്സരങ്ങള് പൂര്ത്തിയാകും.
രാത്രി 9.30ന് നടക്കുന്ന രണ്ടാം റൗണ്ട് പോരാട്ടത്തില് തീപാറുമെന്ന് ഉറപ്പാണ്. ആദ്യ റൗണ്ട് ഏറ്റുമുട്ടലുകള് കഴിയുമ്പോള് ഗ്രൂപ്പ് എയില് തോല്വിയോടെ മൂന്നാം സ്ഥാനത്ത് നില്ക്കുന്ന ചെക്കും നാലാമതുള്ള ദക്ഷിണാഫ്രിക്കയുമാണ് നേര്ക്കുനേര് വരുന്നത്. ഈ രണ്ട് ടീമുകള്ക്കും ഇന്ന് ജയിച്ചേ തീരു. പരാജയപ്പെട്ടാല് സാധ്യത തന്നെ ഇല്ലാതാകും. സമനിലയിലായാണെങ്കില് മികച്ച എട്ട് മൂന്നാം സ്ഥാനക്കാര്ക്ക് പ്രവേശനം നേടാനാകുമെന്ന ആശ്വാസമുണ്ട് പക്ഷെ മൂന്നാം മത്സരം ജയിക്കേണ്ടത് അത്യാവശ്യമാകും.
തുടര്ന്ന് നടക്കുന്ന രണ്ട് മത്സരങ്ങള് ഗ്രൂപ്പ് ബി പോരാട്ടങ്ങളാണ്. ഈ ഗ്രൂപ്പില് ആദ്യ റൗണ്ട് പോരാട്ടത്തില് രണ്ട് മത്സരങ്ങളും 1-1ല് കലാശിച്ചതോടെ സ്വിറ്റ്സര്ലന്ഡ്, കാനഡ, ഖത്തര്, ബോസ്നിയ ടീമുകള് പോയിന്റ് നിലയിലും വഴങ്ങിയ ഗോളിന്റെയും വാങ്ങിയ ഗോളിന്റെയും എല്ലാം അടിസ്ഥാനത്തില് തുല്യനിലയിലാണ്. രാത്രി 12.30ന് സ്വിസ്സ് പട ബോസ്നിയയെയും നാളെ പുലര്ച്ചെ 3.30ന് കാനഡ ഖത്തറിനെയു നേരിടും.
