കൊച്ചി: മാസപ്പടി കേസില്‍ പ്രതിപക്ഷ നേതാവ് പിണറായി വിജയന്റെ മകളും മുന്‍ മന്ത്രിയും നിലവില്‍ എം എല്‍ എയുമായ മൊഹമ്മദ് റിയാസിന്റെ ഭാര്യയുമായ ടി. വീണയുടെ ചോദ്യം ചെയ്യല്‍ പൂര്‍ത്തിയായി. കൊച്ചിയിലെ ഇ ഡി ഓഫീസില്‍ ഒന്‍പത് മണിക്കൂറോളമാണ് ചോദ്യം ചെയ്യല്‍ നീണ്ടത്.
ചോദ്യം ചെയ്യലിന് ശേഷം പുറത്തുവന്ന വീണ മാധ്യമങ്ങളോട് പ്രതികരിക്കാതെ കാറില്‍ മടങ്ങി.കൂടുതല്‍ ചോദ്യം ചെയ്യലിനായി വീണയെ വിളിപ്പിക്കാനാണ് സാധ്യത.ആവശ്യമെങ്കില്‍ വീണ്ടും വിളിപ്പിക്കുമെന്നാണ് ഉദ്യോഗസ്ഥര്‍ വ്യക്തമാക്കിയത്.
ബുധനാഴ്ച രാവിലെ 10.30 ഓടെയാണ് വീണ കൊച്ചിയിലെ ഇഡി ഓഫീസിലെത്തിയത്. ഭര്‍ത്താവ് പി.എ. മുഹമ്മദ് റിയാസ് എംഎല്‍എയ്‌ക്കൊപ്പം കാറിലാണ് വീണ ഇഡി ഓഫീസില്‍ എത്തിയത്. പതിനൊന്ന് മണിയോടെയാണ് ചോദ്യം ചെയ്യല്‍ ആരംഭിച്ചത്.
കഴിഞ്ഞ 12ന് ഹാജരാകാന്‍ വീണയോട് ഇഡി ആവശ്യപ്പെട്ടിരുന്നെങ്കിലും ആരോഗ്യപ്രശ്‌നങ്ങള്‍ കാരണം ഹാജരാകാത്ത സാഹചര്യത്തില്‍ 17ന് എത്താന്‍ ഇഡി വീണ്ടും സമന്‍സ് അയയ്‌ക്കുകയായിരുന്നു.എസ് എഫ് ഐ ഒയുടെ കൈവശമുളള വീണയുമായി ബന്ധപ്പെട്ട കേസിന്റെ രേഖകള്‍ ഇ ഡിക്ക് ലഭിച്ച ശേഷം ഇന്നത്തെ ചോദ്യം ചെയ്യലില്‍ ലഭിച്ച വിവരങ്ങള്‍ ഒത്തുനോക്കിയ ശേഷമാകും കൂടുതല്‍ നടപടികള്‍.
നല്‍കാത്ത സേവനത്തിന് കരിമണല്‍ കമ്പനി സിഎംആര്‍എല്‍,വീണയുടെ എക്‌സാലോജിക്ക് കമ്പനിക്ക് 2.78 കോടി രൂപ നല്‍കിയത് എന്തിനാണ് എന്നതാണ് ഇഡി അന്വേഷിക്കുന്നത്. മേയ് 27ന് നടത്തിയ റെയ്ഡില്‍ പിണറായിയുടെ തിരുവനന്തപുരത്തെ ബേക്കറി ജംഗ്ഷനിലെ വാടക വീട്ടില്‍ നിന്ന് വീണയുടെ ബാങ്ക് അക്കൗണ്ട് രേഖകളും മൊബൈല്‍ ഫോണും ഇഡി കസ്റ്റഡിയില്‍ എടുത്തിരുന്നു.
