തിരുവനന്തപുരം: തെരഞ്ഞെടുപ്പിലെ യുഡിഎഫ് അനുകൂല തരംഗം തിരിച്ചറിയാനായില്ലെന്ന് സി പി ഐ സംസ്ഥാന എക്‌സിക്യൂട്ടീവില്‍ അവതരിപ്പിച്ച റിവ്യൂ റിപ്പോര്‍ട്ടില്‍ കുറ്റസമ്മതം.സര്‍ക്കാരിന്റെ മുന്‍ഗണനയില്‍ പാളിച്ച ഉണ്ടായിരുന്നത് ജനങ്ങളില്‍ എതിര്‍വികാരം ഉണ്ടാക്കി.
കള്ള് ഷാപ്പുകളുടെ ദുരപരിധി കുറയ്‌ക്കാതെ ബാറുകള്‍ക്ക് ഇളവ് നല്‍കി. ക്ഷേമനിധി ബോര്‍ഡുകളുടെ കുടിശിക, ആശാ സമരത്തോടുളള സമീപനം തുടങ്ങിയവ ജനങ്ങളെ എതിരാക്കി.
വികസന -ക്ഷേമ നടപടികള്‍ കൊണ്ട് എതിര്‍വികാരങ്ങളെ മറികടക്കാമെന്ന വിശ്വാസം ശരിയായില്ല. മുഖ്യമന്ത്രിയുടെ ചിത്രം വെച്ചുളള ബോര്‍ഡുകളും തിരഞ്ഞെടുപ്പില്‍ തിരിച്ചടിയുണ്ടാക്കിയെന്ന് റിവ്യൂ റിപ്പോര്‍ട്ടില്‍ പറയുന്നു. എന്നാല്‍ പരാജയത്തിന് വ്യക്തികളെ മാത്രം കുറ്റക്കാരാക്കുന്നത് ശരിയല്ലെന്നും സംസ്ഥാന എക്‌സിക്യൂട്ടീവ് വിലയിരുത്തി.
പരസ്യ പ്രസ്താവന നടത്തിയ മുതിര്‍ന്ന നേതാവ് കെ.ആര്‍.ചന്ദ്രമോഹനനെ താക്കീത് ചെയ്യാന്‍ പാര്‍ട്ടി സംസ്ഥാന എക്‌സിക്യൂട്ടീവ് അനുമതി നല്‍കി.
