ഹാജരാകാതിരുന്നത് ഒത്തുതീര്‍പ്പിനോ?, വിജയ്, സംഗീത വിവാഹമോചന കേസ് പരിഗണിക്കുന്നത് വീണ്ടും മാറ്റി

ചെന്നൈ: തമിഴ്‌നാട് മുഖ്യമന്ത്രിയും ടിവികെ മേധാവിയുമായ സി. ജോസഫ് വിജയ്, ഭാര്യ സംഗീത എന്നിവരുടെ വിവാഹമോചന കേസ് ചെങ്കല്‍പ്പട്ടിലെ കുടുംബ കോടതി വീണ്ടും മാറ്റിവച്ചു. ഇരുവരും വീണ്ടും ഒത്തുചേരുന്നുവെന്ന റിപ്പോര്‍ട്ടുകള്‍ക്കിടെയാണിത്.
വിവാഹമോചന ഹര്‍ജി ചെങ്കല്‍പ്പേട്ട് കുടുംബക്ഷേമ കോടതി തിങ്കളാഴ്ച പരിഗണിക്കാനിരുന്നതാണ്. എന്നാല്‍ ഇരുവരും ഹാജരാകാഞ്ഞതിനെത്തുടര്‍ന്നാണ് വാദം കേള്‍ക്കല്‍ ആഗസ്റ്റ് 7 ലേക്ക് മാറ്റിയത്.
2025ലാണ് സംഗീത ചെങ്കല്‍പ്പേട്ട് ജില്ലാ കോടതിയില്‍ വിജയ്‌ക്കെതിരെ വിവാഹമോചന ഹര്‍ജി നല്‍കിയത്. പിന്നീട് അത് കുടുംബ കോടതിയിലേക്ക് മാറ്റുകയായിരുന്നു.
വിജയ് ഒരു പ്രമുഖ നടിയുമായി അവിഹിത ബന്ധത്തിലാണെന്ന് വിവാഹമോചന ഹര്‍ജിയില്‍ സംഗീത ആരോപിച്ചിരുന്നു. എതിര്‍ത്തിട്ടും ബന്ധം തുടരുക മാത്രമല്ല നടിയോടൊപ്പം യാത്രകള്‍ നടത്തുകയും പരിപാടികളില്‍ പങ്കെടുക്കുകയും ചെയ്തു. തനിക്ക് മുമ്പ് ലഭ്യമായിരുന്ന സൗകര്യങ്ങള്‍ വിജയ് നിഷേധിച്ചുവെന്നും സാമ്പത്തികവും അല്ലാതെയുമുള്ള നിയന്ത്രണങ്ങള്‍ ഏര്‍പ്പെടുത്തിയെന്നും ഹര്‍ജിയില്‍ ആരോപിച്ചിട്ടുണ്ട്.