കൊച്ചി: സംസ്ഥാനത്ത് സെന്സസ് നടപടികള്ക്ക് നാളെ തുടക്കമാകും. പൗരന്മാര്ക്ക് ഓണ്ലൈനായി സ്വയം സ്ഥിതിവിവരക്കണക്ക് നല്കുന്ന സെല്ഫ് എന്യൂമറേഷനാണ് നാളെ തുടങ്ങുക. നാളെ മുതല് 30 വരെ പ്രത്യേക സൈറ്റിലൂടെ വിവരങ്ങള് കൈമാറാം. 2026 ജൂലൈയിലും, 2027 ഫെബ്രുവരിയിലുമായി രണ്ട് ഘട്ടങ്ങളിലായാണ് വീടുകളില് നേരിട്ടെത്തി സെന്സസ് നടത്തുക.
ഡിജിറ്റല് സംവിധാനത്തിലുള്ള വിവരശേഖരണം, ജാതി അടിസ്ഥാന ജനസംഖ്യ കണക്കെടുപ്പ്, സ്ഥാവര വിവരശേഖരണം, സ്വയം പ്രഖ്യാപിത വിവര കൈമാറ്റം തുടങ്ങി പുതുമകള് ഏറെയുള്ള സവിശേഷതകളോടെയാണ് സെന്സസ് നടക്കുന്നത്. ഭാരതത്തിലെ 16-ാമത് സെന്സസാണിത്. 2021 ല് നടക്കേണ്ട സെന്സസ് മഹാമാരിയും തെരഞ്ഞെടുപ്പും മൂലം നീണ്ടുപോയി. വീടുകളുടെ വിവരശേഖരണമാണ് ആദ്യഘട്ടം.
ജൂലൈ ഒന്ന് മുതല് 30 വരെയാണ് എന്യൂമറേറ്റര്മാര് വീടുകളിലെത്തി ഹൗസ് ലിസ്റ്റിങ് വിവര ശേഖരണം നടത്തുക. 60,000 എന്യൂമറേറ്റര്മാര്, 10,000 സൂപ്പര്വൈസര്മാര്, ഐടി വിദഗ്ധര്, ഡാറ്റാ ഓപ്പറേറ്റര് അടക്കമുള്ള വലിയൊരു വിഭാഗം മനുഷ്യ പ്രയത്നമാണ് ജനസംഖ്യ വിവരശേഖരണത്തില് സജീവമാകുന്നത്. ഇതിനായുള്ള പരിശീലന- നിര്ദേശ ക്ലാസുകള് സംസ്ഥാനത്ത് നടന്നുവരികയാണ്.
1931ന് ശേഷം ആദ്യമായാണ് രാജ്യത്ത് സാമൂഹിക-സാമ്പത്തിക- ജാതി നിലവാരത്തില് ജനസംഖ്യ കണക്കെടുപ്പ് നടക്കുന്നത്. 1968ല് ഇഎംഎസ് സര്ക്കാരിന്റെ നേതൃത്വത്തില് സംസ്ഥാനത്ത് ജാതി- പിന്നോക്കാവസ്ഥ കണക്കെടുപ്പ് നടന്നിരുന്നു. 2027 ഫെബ്രുവരിയിലാണ് ജനസംഖ്യാടിസ്ഥാന കനേഷുമാരി കണക്കെടുപ്പ് നടക്കുക. രാജ്യത്ത് 16 ഭാഷകളിലായാണ് സെന്സസ് നടത്തുന്നത്. 13,000 കോടിയോളം രൂപയാണ് ചെലവ് പ്രതീക്ഷിക്കുന്നത്. സെന്സസ് വിവര ശേഖരണത്തിനായി പ്രത്യേക ആപ്പ്, സൈറ്റ്, ഡാറ്റാ സംവിധാനം എന്നിവയടക്കം പൂര്ണമായും ഡിജിറ്റല് സാങ്കേതികവിദ്യയാണ് പ്രയോജനപ്പെടുത്തുന്നത്. 2011 ഏപ്രിലിലാണ് രാജ്യത്ത് ജനസംഖ്യ അടിസ്ഥാന കനേഷുമാരി നടന്നത്.
