വാഷിംഗ്ടണ്: ജൂണ് 17നാണ് ലോകം കാത്തിരിക്കുന്ന പോര്ച്ചുഗലിന്റെ ക്രിസ്റ്റ്യാനോ റൊണാള്ഡോ ഈ ലോകകപ്പില് ആദ്യ മത്സരത്തിന് ഇറങ്ങുന്നത്. ഫിഫ ലോകകപ്പ് മത്സരങ്ങള്ക്കായി പോര്ച്ചുഗല് ടീമും റൊണാള്ഡോയും അമേരിക്കയിലെ ടെക്സസില് പരിശീലനം നടത്തിവരികയാണ്. ആ പരിശീലന ക്യാമ്പിലേക്ക് യാദൃച്ഛികമായി ഒരു സ്ത്രീ കടന്നുവന്നു. ഏറെ ആരാധിക്കുന്ന റൊണാള്ഡോ നേരിട്ട് കാണാന് ഒട്ടേറെ സാഹസികതകള് താണ്ടി എത്തിയിരിക്കുകയാണ് ബെല്ജിയംകാരിയായ സെലിന് എന്ന യൂട്യൂബര്. റൊണാള്ഡോയെ കണ്ട മാത്രയില് ഈ ബെല്ജിയന് വനിതാ യൂട്യൂബര് പൊട്ടിക്കരഞ്ഞു. റൊണാള്ഡോയെ കണ്ടതോടെ വികാരാധീനയായി പൊട്ടിക്കരഞ്ഞ സെലിനെയും സെലിനെ ആലിംഗനം ചെയ്യുന്ന റൊണാള്ഡോയും ഇന്ന് ലോകമെമ്പാടുമുള്ള സമൂഹമാധ്യമങ്ങള് കീഴടക്കുകയാണ്.
റൊണാള്ഡോ തന്റെ അടുത്തേക്ക് നടന്നു വരുന്നതു കാണുമ്പോള് തന്നെ യൂട്യൂബര് സെലിന് ഡെപ്റ്റ് കണ്ണ് തുടയ്ക്കുന്നതും വിതുമ്പുന്നതും കാണാം. ആരാധികയുടെ അടുത്തെത്തിയ സൂപ്പര്താരം, ‘കരയരുത്’ എന്ന് സ്നേഹത്തോടെ പറഞ്ഞുകൊണ്ട് സെലിനെ കെട്ടിപ്പിടിച്ച് ആശ്വസിപ്പിക്കുന്നത് കാണാം. തുടര്ന്ന് ‘സ്പാനിഷാണോ അതോ ഇംഗ്ലീഷാണോ സംസാരിക്കേണ്ടത്’ എന്ന് റൊണാള്ഡോ ചോദിച്ചപ്പോള് ഇംഗ്ലീഷ് എന്ന് സെലിന് മറുപടി നല്കി. തുടര്ന്ന് ഇംഗ്ലീഷിലായിരുന്നു ഇരുവര്ക്കുമിടയിലെ സംഭാഷണം.
തനിക്ക് നല്കിയ എല്ലാ നല്ല നിമിഷങ്ങള്ക്കും പ്രചോദനങ്ങള്ക്കും റൊണാള്ഡോയോട് സെലിന് നന്ദി പറഞ്ഞു. കൂടെനിന്ന് ഒരു ഫോട്ടോ എടുത്തോട്ടെ എന്ന് സെലിന് ചോദിച്ചപ്പോള്, ‘ആദ്യം കവിളിലെ കണ്ണീര് തുടയ്ക്കൂ’ എന്ന് സ്നേഹപൂര്വ്വം നിര്ദ്ദേശിച്ച റൊണാള്ഡോ, അവരെ ചേര്ത്തുപിടിച്ച് ഫോട്ടോയ്ക്ക് പോസ് ചെയ്ത ശേഷമാണ് മടക്കി അയച്ചത്.
യുട്യൂബിലും ടിക്ടോക്കിലും കോടിക്കണക്കിന് ആരാധകരുള്ള പ്രശസ്ത ബെല്ജിയന് ഇന്ഫ്ലുവന്സറാണ് 26 വയസ്സുകാരിയായ സെലിന് ഡെപ്റ്റ്. ടിക്ടോക്കില് 16 ദശലക്ഷത്തിലധികം ഫോളോവേഴ്സുള്ള സെലിന് യുട്യൂബില് 60 ദശലക്ഷത്തിനടുത്ത് സബ്സ്ക്രൈബര്മാരുമുണ്ട്. മുന്പ് കിലിയന് എംബാപ്പെ, എര്ലിങ് ഹാലന്ഡ്, നെയ്മാര് എന്നിവരുള്പ്പെടെയുള്ള ലോകോത്തര ഫുട്ബോള് താരങ്ങള്ക്കൊപ്പവും സെലിന് ഡെപ്റ്റ് വിഡിയോകള് ചെയ്തിട്ടുണ്ട്.
ഫിഫ ലോകകപ്പില് ജൂണ് 17-നാണ് പോര്ച്ചുഗലിന്റെ ആദ്യ മത്സരം നടക്കുന്നത്. കോംഗോയാണ് ആദ്യ പോരാട്ടത്തില് പോര്ച്ചുഗലിന്റെ എതിരാളികള്. 41 വയസ്സായ ക്രിസ്റ്റ്യന് റൊണാള്ഡോയുടെ അവസാന ലോകകപ്പാണിത്. ഇതില് കപ്പ് നേടുക എന്നതില് കുറഞ്ഞൊന്നും റൊണാള്ഡോ ആഗ്രഹിക്കുന്നില്ല.
