ന്യൂദൽഹി: ലോക് സഭാ സ്പീക്കര് ഓം ബിര്ളയെ കണ്ടുവെന്നും പാര്ലമെന്റില് പ്രത്യേക ബ്ലോക്കായി ഇരിക്കുമെന്നും 20 വിമത തൃണമൂല് എംപിമാരുടെ നേതാവായ കകോലി ഘോഷ്. ഈ 20 പേരടങ്ങുന്ന വിമത വിഭാഗം ത്രിപുരയിൽ നിന്നുള്ള ബംഗാളി രാഷ്ട്രീയ പാർട്ടിയായ നാഷണലിസ്റ്റ് സിറ്റിസൺസ് പാർട്ടിയിൽ ലയിക്കുമെന്നും കകോലി ഘോഷ് അറിയിച്ചു.
കഴിഞ്ഞ 40 വര്ഷമായി മമതയ്ക്കൊപ്പം നിഴലുപോലെ നിന്ന ഈ നേതാവിന്റെ നേതൃത്വത്തിലാണ് മറ്റ് 19 വിമത തൃണമൂല് എംപിമാര് ബിജെപി നേതൃത്വത്തിലുള്ള എന്ഡിഎയ്ക്ക് പിന്തുണ നല്കുന്നത് . ലോക്സഭാ സ്പീക്കർ ഓം ബിർളയെ കണ്ട് കത്ത് സമർപ്പിച്ച ശേഷമാണ് ശനിയാഴ്ച കകോലി ഘോഷ് ഈ പ്രഖ്യാപനം നടത്തിയത്. പാർലമെന്റിൽ വെവ്വേറെ ഇരിക്കുമെന്നും പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ പ്രവർത്തിക്കുമെന്നും അവര് പറഞ്ഞു.
“ഞങ്ങൾക്ക് മൂന്നിൽ രണ്ട് ഭൂരിപക്ഷമുണ്ട്. ഞങ്ങൾ എൻഡിഎയുടെ ഭാഗമാകും, പ്രധാനമന്ത്രിയുടെ നേതൃത്വത്തിൽ പ്രവർത്തിക്കും” കകോലി ഘോഷ് കൂട്ടിച്ചേർത്തു. ലോക്സഭയിൽ 28 എംപിമാരുള്ള തൃണമൂലിനുള്ളിലെ പ്രതിസന്ധി കൂടുതൽ രൂക്ഷമാക്കുകയും പാർലമെന്റിന്റെ മൺസൂൺ സമ്മേളനത്തിന് മുമ്പ് അധോസഭയിലെ പ്രതിപക്ഷ അംഗങ്ങളുടെ എണ്ണം ഗണ്യമായി കുറയ്ക്കുകയും ചെയ്യും.
പ്രത്യേക ബ്ലോക്ക് രൂപീകരിക്കുന്നതിൽ അനിവാര്യമായും ഉണ്ടാകുന്ന നിയമപരമായ സങ്കീർണതകൾ ഒഴിവാക്കുന്നതിനാണ് പുതിയ പാര്ട്ടിയില് ലയിക്കാനുള്ള തീരുമാനം എടുത്തതെന്ന് വൃത്തങ്ങൾ പറഞ്ഞു.
“ഞങ്ങൾ നാഷണലിസ്റ്റ് സിറ്റിസൺസ് പാർട്ടിയിൽ ലയിക്കും… അതൊരു പ്രാദേശിക പാർട്ടിയാണ്”.-പാർട്ടി മേധാവിയും മുഖ്യമന്ത്രി മമത ബാനർജിയുടെ അടുത്ത സഹായിയും വിമത ഗ്രൂപ്പിലേക്ക് മാറിയ അവസാന എംപിമാരിൽ ഒരാളുമായ തൃണമൂലിന്റെ സുദീപ് ബന്ദോപാധ്യായ പറഞ്ഞു:
അതേ സമയം മൂന്നില് രണ്ട് ഭൂരിപക്ഷമുള്ളതിനാൽ ഞങ്ങൾ തൃണമൂൽ (പേര്) എന്ന പേര് ആവശ്യപ്പെടുമെന്നും ഇതില് കോടതി അന്തിമതീരുമാനമെടുക്കുമെന്നും അദ്ദേഹം കൂട്ടിച്ചേർത്തു.
