ഭാരതീയ തത്ത്വചിന്താ പാരമ്പര്യത്തിലെ ഉജ്ജ്വലവും സ്വാധീന ശക്തിയുള്ളതുമായ ദര്ശനമാണ് അദ്വൈതം. ‘രണ്ടല്ലാത്തത്’ എന്ന് അര്ത്ഥം. പ്രപഞ്ചവും വ്യക്തിയും പരമാത്മാവും വേറിട്ടതല്ലെന്നും, എല്ലാം ഒന്നാണെന്നുമുള്ള മഹത്തായ സത്യമാണ് ഇത് വെളിവാക്കുന്നത്. ആദി ആദിശങ്കരാചാര്യര് പുനരുജ്ജീവിപ്പിച്ച ഈ ദര്ശനം ആത്മീയ സിദ്ധാന്തം മാത്രമല്ല, ആധുനിക ലോകം നേരിടുന്ന പ്രശ്നങ്ങള്ക്കുള്ള ശാശ്വത പരിഹാരം കൂടിയാണ്. ‘ഏകം സത് വിപ്രാ ബഹുധാ വദന്തി’ എന്ന വേദവാക്യം അദ്വൈതത്തിന്റെ അടിത്തറയാണ്.
അദ്വൈത ദര്ശനത്തിന്റെ കാതല്: സത്യം ഒന്നേയുള്ളൂ. അത് ബ്രഹ്മമാണ്. ‘അഹം ബ്രഹ്മാസ്മി’, ‘തത്ത്വമസി’ തുടങ്ങിയവ ഉദ്ഘോഷിക്കുന്നത് വ്യക്തിയും പ്രപഞ്ചശക്തിയും തമ്മിലുള്ള അഭേദ്യ ബന്ധത്തെയാണ്. നദികള് പലതാണെങ്കിലും അവ ചെന്നുചേരുന്നത് ഒരേ സമുദ്രത്തിലാണെന്നതുപോലെ, പുറമെ കാണുന്ന വൈവിധ്യങ്ങള്ക്കെല്ലാം ഉള്ളിലായി വര്ത്തിക്കുന്ന എകത്വമാണ് അദ്വൈതം. ലോകം മിഥ്യയാണെന്ന് പറയുമ്പോള് അത് നിലനില്ക്കുന്നില്ല എന്നല്ല, മാറ്റമില്ലാത്ത സത്യം ആ ഏകമായ ചൈതന്യം മാത്രമാണെന്നാണ് അര്ത്ഥമാക്കുന്നത്.
ഇന്നത്തെ ലോകം ജാതി, മതം, വര്ണം, വര്ഗം എന്നിവയുടെ പേരില് വിഭജിക്കപ്പെട്ടിരിക്കുന്നു. ഇവിടെയാണ് അദ്വൈത സിദ്ധാന്തത്തിന്റെ പ്രസക്തി.
ഏവരിലും ഒരേ ചൈതന്യമാണ് കുടികൊള്ളുന്നതെന്ന ബോധം വരുമ്പോള് വിവേചനം അപ്രത്യക്ഷമാകും. മറ്റൊരുവനെ വേദനിപ്പിക്കുന്നത് തന്നെത്തന്നെ വേദനിപ്പിക്കുന്നതിന് തുല്യമാണെന്ന ചിന്ത സാമൂഹിക നീതിക്കും സമാധാനത്തിനും വഴിയൊരുക്കും.
അഭയം: നമ്മില് നിന്ന് വേറിട്ട ഒന്നില്ല എന്ന തിരിച്ചറിവ് ഭയത്തെ ഇല്ലാതാക്കുന്നു. മറ്റുള്ളവരെ അന്യരായി കാണാത്തതുകൊണ്ടുതന്നെ മത്സരബുദ്ധിയും വിദ്വേഷവും കുറയുകയും ആത്മവിശ്വാസം വര്ദ്ധിക്കുകയും ചെയ്യും.
വിശ്വമാനവികത: ‘വസുധൈവ കുടുംബകം’ എന്ന സങ്കല്പം അദ്വൈതത്തിന്റെ പ്രായോഗിക രൂപമാണ്. അതിര്വരമ്പുകളില്ലാത്ത സ്നേഹവും കരുണയും വളര്ത്താന് ഈ ദര്ശനം സഹായിക്കുന്നു. എല്ലാ വിശ്വാസങ്ങളും ഒരേ ലക്ഷ്യത്തിലേക്കുള്ള വിവിധ പാതകളാണെന്ന് അദ്വൈതം പഠിപ്പിക്കുന്നു. ഇത് മതപരമായ അസഹിഷ്ണുത ഇല്ലാതാക്കാനും മതസൗഹാര്ദ്ദം വളര്ത്താനും അത്യന്താപേക്ഷിതമാണ്.
സേവനം എന്ന ആരാധന: അദ്വൈത ദര്ശനം പിന്തുടരുന്ന ഒരാള്ക്ക് മറ്റുള്ളവരെ സഹായിക്കുന്നത് സ്വന്തം ആത്മാവിനെ സേവിക്കുന്നത് പോലെയാണ്. സ്വാമി വിവേകാനന്ദന് ‘പ്രായോഗിക അദ്വൈതം’ എന്ന ആശയത്തിലൂടെ ഇതിനെ ലളിതമാക്കി. പാവപ്പെട്ടവനെ സേവിക്കുന്നത് ദൈവത്തെ സേവിക്കുന്നതിന് തുല്യമാണെന്ന് അദ്ദേഹം ഓര്മ്മിപ്പിച്ചു. വിദ്യാഭ്യാസം, ആരോഗ്യം, ദാരിദ്ര്യനിര്മ്മാര്ജ്ജനം എന്നീ മേഖലകളില് അദ്വൈതചിന്ത പകര്ത്തിയാല് ലോകത്ത് വലിയ മാറ്റങ്ങള് വരും.
ഭാരതം ലോകത്തിനു നല്കിയ ഏറ്റവും വലിയ ദാനമാണ് അദ്വൈതം. വംശീയമായ വേര്തിരിവുകളും യുദ്ധങ്ങളും പരിസ്ഥിതി നാശവും നേരിടുന്ന ഈ കാലഘട്ടത്തില്, ‘എല്ലാം ഒന്ന്’ എന്ന അദ്വൈത സന്ദേശം ജീവനമന്ത്രമായി മാറണം. വ്യക്തിപരമായ പരിവര്ത്തനത്തിലൂടെ സാമൂഹിക ഐക്യവും പ്രകൃതിയോടുള്ള ആദരവിലൂടെ സുസ്ഥിരമായ ഭാവിയും കെട്ടിപ്പടുക്കാന് അദ്വൈത ദര്ശനം കരുത്ത് പകരും. ‘ലോകാഃ സമസ്താഃ സുഖിനോ ഭവന്തുഃ’ എന്ന പ്രാര്ത്ഥന യാഥാര്ത്ഥ്യമാക്കാന് അദ്വൈത ചിന്തക്ക് സാധിക്കും. ലോക സമാധാനത്തിന് ഭാരതത്തിന്റെ ഈ മഹത്തായ സന്ദേശം ഉള്ക്കൊളളുക എന്നത് കാലഘട്ടത്തിന്റെ അനിവാര്യതയാണ്.
ജന്മഭൂമി ഓണ്ലൈന്