മലപ്പുറം: വീട്ടിനുള്ളിൽ നിന്നും മുട്ടിലിഴഞ്ഞ് തിരക്കേറിയ നടുറോഡിലെത്തിയ കുഞ്ഞിന് രക്ഷകരായി ബസ് ജീവനക്കാർ . റോഡിന് നടുവിലിരുന്ന കുഞ്ഞിനെ കണ്ട് ഡ്രൈവർ ബസ് പെട്ടെന്ന് നിർത്തുകയായിരുന്നു. ജീവനക്കാരൻ ഓടിയെത്തി കുഞ്ഞിനെ എടുക്കുന്നതിന്റെ സിസിടിവി ദൃശ്യങ്ങളും ഇപ്പോൾ പുറത്തുവന്നിട്ടുണ്ട്.
കൊണ്ടോട്ടി പുളിക്കൽ റോഡിലെ വലിയപറമ്പിലാണ് സംഭവം . ബുധനാഴ്ച രാവിലെ എട്ടരയോടെ ഈ റൂട്ടിലോടുന്ന ഒരു സ്വകാര്യ ബസ് കടന്നുപോകുമ്പോഴാണ് ഡ്രൈവർ റോഡിന് നടുവിൽ എന്തോ ഇരിക്കുന്നത് ശ്രദ്ധിക്കുന്നത്. അടുത്തെത്തിയപ്പോഴാണ് അത് ഒരു പിഞ്ചുകുഞ്ഞാണെന്ന് മനസ്സിലായത്. തൊട്ടടുത്ത നിമിഷം തന്നെ ഡ്രൈവർ ബസ് ബ്രേക്കിട്ട് നിർത്തുകയും, ഇതുകണ്ട് പുറകിൽ നിന്നും ഓടിയിറങ്ങിയ കണ്ടക്ടർ കുഞ്ഞിനെ റോഡിൽ നിന്നും എടുക്കുകയുമായിരുന്നു.
ഈ സമയം കുഞ്ഞിന്റെ പിതാവ് വീടിന്റെ മുൻപിലിരുന്ന് പത്രം വായിക്കുകയായിരുന്നു. ബസ് കണ്ടക്ടർ കുഞ്ഞിനെയും എടുത്തുകൊണ്ട് വീട്ടിലേക്ക് ചെന്നപ്പോൾ മാത്രമാണ് കുഞ്ഞ് റോഡിൽ പോയ വിവരം വീട്ടുകാർ പോലും അറിയുന്നത്.
