മാവേലിക്കര: സംസ്ഥാനത്ത് മോട്ടോര്വാഹനവകുപ്പിന് കീഴില് ഒഴിവുള്ള അസിസ്റ്റന്റ് മോട്ടോര് വെഹിക്കിള് തസ്തികയിലേക്ക് അപേക്ഷ ക്ഷണിച്ചെങ്കിലും, അപേക്ഷ സമര്പ്പിക്കേണ്ട അവസാന തീയതിയായ ജൂലൈ ഒന്നിന് മുന്പ് ഹെവി ഗുഡ്സ്, പാസഞ്ചര് ലൈസന്സുകള് വേണമെന്ന നിബന്ധന ഉദ്യോഗാര്ത്ഥികള്ക്ക് തിരിച്ചടിയാകുന്നു.
ബിടെക് മെക്കാനിക്കല് എന്ജിനിയറിങ്, ഓട്ടോമൊബൈല് എന്ജിനിയറിങ്, മെക്കാനിക്കല് ഡിപ്ലോമ യോഗ്യതയുള്ളവര്ക്കാണ് അപേക്ഷിക്കാന് അവസരം. വിജ്ഞാപനം പുറത്തിറക്കിയ ശേഷം ലൈസന്സ് ലഭിക്കാനായി ഉദ്യോഗാര്ത്ഥികള് കൂട്ടത്തോടെ സാരഥി പോര്ട്ടല് വഴി ഹെവി ലൈസന്സിനായി രജിസ്റ്റര് ചെയ്തെങ്കിലും മോട്ടോര് വാഹന നിയമ ചട്ടപ്രകാരം ഡ്രൈവിങ് ടെസ്റ്റിന് ഹാജരാകണമെങ്കില് അപേക്ഷിച്ച് കുറഞ്ഞത് 30 ദിവസമെങ്കിലും കഴിയണം. ആര്ടിഒ ഓഫീസുകളിലെ ഉള്പ്പെടെയുള്ള നടപടികള് പൂര്ത്തീകരിച്ച് മാനദണ്ഡപ്രകാരമുള്ള ഡ്രൈവിങ് ടെസ്റ്റും പൂര്ത്തീകരിച്ച് ലൈസന്സ് ലഭിക്കണമെങ്കില് രജിസ്റ്റര് ചെയ്തതിന്റെ ക്രമം അനുസരിച്ചുള്ള ഊഴം ഓരോ ഉദ്യോഗാര്ത്ഥിക്കും ലഭിക്കണം. ഇതിനായി പിന്നെയും കാത്തിരിക്കണം. അതിനാല്, അപേക്ഷ സമര്പ്പിക്കാനുള്ള തീയതി നീട്ടി നല്കണമെന്നും എഴുത്ത് പരീക്ഷ സമയത്തോ, ഒറ്റത്തവണ പരിശോധന സമയത്തോടെ ഹെവി ലൈന്സ് ഹാജരാക്കുന്നതിനുള്ള വ്യവസ്ഥ ഏര്പ്പെടുത്തി, അപേക്ഷ സ്വീകരിക്കാനുള്ള നടപടികള് സ്വീകരിക്കണമെന്നാണ് ഉദ്യോഗാര്ത്ഥികളുടെ ആവശ്യം.
ഏറെ നാളത്തെ കാത്തിരിപ്പിന് ശേഷമാണ് മോട്ടോര് വാഹനവകുപ്പില് അസി. മോട്ടോര് വെഹിക്കിള് തസ്തികയിലേക്കുള്ള അപേക്ഷ ക്ഷണിക്കുന്നത്. അതിനാല്, ആയിരക്കണക്കിന് ഉദ്യോഗാര്ത്ഥികളാണ് ഈ തസ്തിക ആഗ്രഹിച്ച് തയാറെടുപ്പുകള് നടത്തുന്നത്.
