കൊല്ക്കത്ത: ബംഗാളില് പുതുതായി അധികാരത്തില് വന്ന മുഖ്യമന്ത്രി സുവേന്ദു അധികാരിയുടെ നേതൃത്വത്തിലുള്ള ബിജെപി സര്ക്കാരിനെ പുകഴ്ത്തി മുന് കമ്മ്യൂണിസ്റ്റ് മുഖ്യമന്ത്രി ബുദ്ധദേവ് ഭട്ടാചാര്യയുടെ ഭാര്യ മീര ഭട്ടാചാര്യ.
തെരഞ്ഞെടുപ്പ് വാഗ്ദാനങ്ങള് വേഗത്തില് നടപ്പിലാക്കിയത് നല്ല മതിപ്പ് സൃഷ്ടിച്ചുവെന്ന് പറഞ്ഞ മീര ഭട്ടാചാര്യ ഏതാനും ദിവസങ്ങള്ക്കുള്ളില് പുതിയ സര്ക്കാര് പ്രവര്ത്തിച്ച രീതി വളരെ പ്രശംസനീയമാണെന്നും പറഞ്ഞു.
സ്ത്രീകള്ക്ക് സൗജന്യ ബസ് യാത്ര പോലുള്ള ക്ഷേമ നടപടികള് പ്രാവര്ത്തികമാക്കി. ബിജെപി അവരുടെ വാഗ്ദാനങ്ങള് വളരെ വേഗത്തില് നടപ്പിലാക്കുന്നത് കാണുന്നതില് സന്തോഷമുണ്ട്. തെരഞ്ഞെടുപ്പിന് മുമ്പ് നല്കിയ വാഗ്ദാനങ്ങള് നടപ്പിലാക്കാന് പുതിയ സര്ക്കാര് ആത്മാര്ത്ഥമായ ശ്രമം നടത്തുകയാണ്.
രാഷ്ട്രീയ ബന്ധങ്ങള് പരിഗണിക്കാതെ സംസ്ഥാനത്തിന്റെ ക്ഷേമത്തിനായി പ്രവര്ത്തിക്കുന്ന ഏതൊരാളും ബഹുമാനം അര്ഹിക്കുന്നു. മുഖ്യമന്ത്രി സുവേന്ദു അധികാരിയെ ഇതുവരെ നേരിട്ട് കണ്ടിട്ടില്ല. എന്നാല് അദ്ദേഹം ബംഗാളിലെ ജനങ്ങള്ക്ക് നല്കിയ വാഗ്ദാനങ്ങള് പാലിക്കുമെന്ന് കരുതുന്നതായും അവര് പറഞ്ഞു. ബംഗാള് എല്ലാ മേഖലകളിലും പുരോഗതി കൈവരിക്കുക എന്നതായിരുന്നു തന്റെ പരേതനായ ഭര്ത്താവിന്റെ സ്വപ്നം.
ബിജെപി സര്ക്കാരിന് ബംഗാളിന്റെ മുന്കാല പ്രതാപവും മഹത്വവും വീണ്ടെടുക്കാന് കഴിയുമെങ്കില് അത് തീര്ച്ചയായും സ്വാഗതം ചെയ്യപ്പെടുകയും അഭിനന്ദിക്കപ്പെടുകയും ചെയ്യുമെന്നും മീര ഭട്ടാചാര്യ പറഞ്ഞു.
