കൊല്ക്കത്ത: ആര്ജി കര് മെഡിക്കല് കോളജ് കേസ് അന്വേഷണവുമായി ബന്ധപ്പെട്ട് മൂന്ന് പോലീസ് ഉദ്യോഗസ്ഥരെ മുഖ്യമന്ത്രി സുവേന്ദു അധികാരി സസ്പെന്ഡ് ചെയ്തു. കൊല്ക്കത്ത മുന് പോലീസ് കമ്മിഷണര് വിനീത് ഗോയല്, മുന് ഡെപ്യൂട്ടി കമ്മിഷണര്മാരായ ഇന്ദിര മുഖര്ജി, അഭിഷേക് ഗുപ്ത എന്നിവര് അന്വേഷണത്തില് വീഴ്ച വരുത്തിയെന്ന് ആരോപിച്ചാണ് നടപടി. വകുപ്പുതല അന്വേഷണത്തിന്റെ അടിസ്ഥാനത്തിലാണ് നടപടിയെന്ന് സുവേന്ദു അധികാരി അറിയിച്ചു.
കേസില് നിന്ന് പിന്മാറുന്നതിന് ആര്ജി കറില് കൊല്ലപ്പെട്ട പെണ്കുട്ടിയുടെ മാതാപിതാക്കള്ക്ക് പണം വാഗ്ദാനം ചെയ്തു, അനധികൃതമായി വാര്ത്താസമ്മേളനം നടത്തി, സംഭവം കൈകാര്യം ചെയ്തതില് വീഴ്ചയുണ്ടായെന്നും കണ്ടെത്തിയതിനെ തുടര്ന്നാണ് സംസ്ഥാന സര്ക്കാര് നടപടി സ്വീകരിച്ചത്. നിലവില് കേസ് സിബിഐ അന്വേഷിച്ച് വരികയാണ്. ഇതില് സംസ്ഥാന സര്ക്കാര് യാതൊരു ഇടപെടലും നടത്തില്ല. ഉദ്യോഗസ്ഥര്ക്കെതിരെയുള്ള അച്ചടക്ക നടപടികളും വകുപ്പുതല അന്വേഷണവും ചീഫ് സെക്രട്ടറിയുടെ മേല്നോട്ടത്തില് സംസ്ഥാന ആഭ്യന്തര സെക്രട്ടറി നിയന്ത്രിക്കുമെന്നും മുഖ്യമന്ത്രി കൂട്ടിച്ചേര്ത്തു.
അതിനിടെ മകളുടെ മൃതദേഹം സംസ്കരിക്കുന്നത് വേഗത്തിലാക്കി തെളിവുകള് നശിപ്പിക്കാന് മുന് ടിഎംസി എംഎല്എ അടക്കം മൂന്ന് പേര് ശ്രമിച്ചെന്നും, ഇവരെ കസ്റ്റഡിയിലെടുത്ത് ചോദ്യംചെയ്യണമെന്നാവശ്യപ്പെട്ട് പെണ്കുട്ടിയുടെ മാതാപിതാക്കള് കോടതിയെ സമീപിച്ചു. മുന് പനിഹത്തി എംഎല്എ നിര്മല് ഘോഷ്, സോമനാഥ് ദാസ്, പ്രാദേശിക ടിഎംസി പ്രവര്ത്തകന് സഞ്ജിബ് മുഖോപാധ്യായ എന്നിവര്ക്കെതിരെയാണ് സീല്ഡ കോടതിയെ സമീപിച്ചത്.
തന്റെ മകള് കൊല്ലപ്പെട്ടശേഷം മൂവരും ചേര്ന്ന് ആര്ജി കര് മെഡിക്കല് കോളജ് ആശുപത്രിയില് നിന്ന് മൃതദേഹം കൈക്കലാക്കി സംസ്കാര നടപടികള് വേഗത്തില് പൂര്ത്തിയാക്കുകയായിരുന്നു. ഇതുമായി ബന്ധപ്പെട്ട രേഖകള് കുടുംബത്തിന് കൈമാറാന് മൂവരും തടസം നിന്നു. മൃതദേഹം പുനപരിശോധന നടക്കാതിരിക്കാനും ഇവര് ശ്രമം നടത്തി. മൂവരേയും കസ്റ്റഡിയില് എടുത്ത് ചോദ്യം ചെയ്യേണ്ടത് ആവശ്യമാണെന്നും മാതാപിതാക്കള് കോടതിയില് ആവശ്യപ്പെട്ടു.
