ന്യൂദല്ഹി: ഇന്ത്യയിലെ ആദ്യത്തെ ഇ85 ഇന്ധന സ്റ്റേഷന് ദല്ഹിയില് തുറന്നു. ഹീറോ മോട്ടോകോര്പ്പ് സ്പ്ലെന്ഡര് പ്ളസിന്റെയും ഒഎ ഡീലക്സിന്റെയും ഇ85അനുയോജ്യമായ പതിപ്പുകള് പുറത്തിറക്കിയതിനു പിന്നാലെയാണിത്. മോദി സര്ക്കാരിന്റെ എഥനോള് പ്രോത്സാഹനം ഇതോടെ പുതിയ ഘട്ടത്തിലേക്ക് കടന്നു. ദല്ഹിയില് ഇ85 ഇന്ധനത്തിന്റെ വില ലിറ്ററിന് 82.12 രൂപയാണ്, ഇ 20 പെട്രോളിനേക്കാള് ഏകദേശം 20 രൂപ കുറവ്.
ആവശ്യകതയുടെ 85% ഇറക്കുമതി ചെയ്യുന്ന അസംസ്കൃത എണ്ണയെ ആശ്രയിക്കുന്നത് കുറയ്ക്കുന്നതിനുള്ള തന്ത്രപരമായ നീക്കമായാണ് ഭാരത സര്ക്കാര് എഥനോള് മിശ്രിതം അവതരിപ്പിക്കുന്നത്. പെട്രോളില് കലര്ത്തുന്ന ഓരോ ലിറ്റര് എഥനോളും ഇറക്കുമതി ചെയ്യേണ്ട അസംസ്കൃത ഇന്ധനത്തിന്റെ അളവ് കുറയ്ക്കുന്നു. ഹീറോ മോട്ടോകോര്പ്പില് നിന്നുള്ള ഫ്ളെക്സ്-ഫ്യൂവല് മോട്ടോര്സൈക്കിളുകളുടെയും മാരുതി സുസുക്കിയുടെ വാഗണ് ആര് ഫ്ളെക്സ് ഫ്യൂവലിന്റെ ലോഞ്ചും ആ ദിശയ്ക്കുള്ള നീക്കങ്ങളാണ്.
