ചന്ദ്രദശാകാലം പത്തുവര്ഷമാണ്. വെളുത്തവാവിന് ജനിച്ചവര്ക്ക് ചന്ദ്രദശാകാലം സന്തോഷകരവും പലവിധ ശുഭാനുഭവങ്ങളെയും സമ്മാനിക്കുന്നതുമായിരിക്കും. എന്നാല് കറുത്തവാവിന് രാത്രി ജനിച്ചവര്ക്ക് ചന്ദ്രദശാകാലം പലവിധത്തില് ക്ളേശകരവും മനഃസമാധാനം കളയുന്നതുമായിരിക്കും. ചന്ദ്രന് പക്ഷബലമേറുമ്പോള് (വെളുത്തവാവിനോടടുക്കുന്തോറും) ശുഭഫലങ്ങള് ഏറുകയും പക്ഷബലം കുറയുമ്പോള് (അമാവാസിയോടടുക്കുമ്പോള്) അശുഭഫലങ്ങള് വര്ദ്ധിക്കുകയും ചെയ്യും. മനകാരകത്വവും മാതൃകാരകത്വവും ചന്ദ്രനായതിനാല് ജാതകത്തില് ചന്ദ്രന് ദുര്ബ്ബലനായവര്ക്ക് ചന്ദ്രദശാകാലത്ത് മനഃസുഖവും മാതൃസുഖവും കുറയും. സൂര്യനോടുചേര്ന്നു നില്ക്കുന്ന ചന്ദ്രന്റെ ദശാകാലവും വൃശ്ചികത്തില് നില്ക്കുന്ന ചന്ദ്രന്റെ ദശാകാലവും അശുഭകരമായിരിക്കും. ലഗ്നസ്ഥിതചന്ദ്രന്റെ ദശാകാലത്ത് ഉദ്യോഗലാഭം, പദവിയില് ഉയര്ച്ച, യുവതീയുവാക്കള്ക്ക് വിവാഹം, ദശാകാലാന്ത്യത്തോടെ ഗൃഹലാഭം എന്നീ ഗുണാനുഭവങ്ങള് ഉണ്ടാകും. രണ്ടാമിടത്തുനില്ക്കുന്ന ചന്ദ്രന്റെ ദശാകാലത്ത് വിദ്യാപുരോഗതി, ഉദ്യോഗലബ്ധി, വ്യാപാര പുരോഗതി, കുടുംബത്തില് ഐശ്വര്യാനുഭവങ്ങള് ഇവ ഫലമാകുന്നു. മൂന്നാമിടത്താണു ചന്ദ്രനെങ്കില് ദശാകാലത്ത് സഹോദരസൗഖ്യം, സുഖാനുഭവങ്ങള്, ധനപരമായ മെച്ചങ്ങള് ഇവ പ്രതീക്ഷിക്കാം. ചന്ദ്രന് നാലാമിടത്താണെങ്കില് ദശാകാലത്ത് മാതൃദുരിതം, ഗൃഹനിര്മ്മാണം, കീര്ത്തി, സാഹിത്യരംഗത്ത് പേരും പ്രശസ്തിയും ഇവ ഫലമാകുന്നു.
അഞ്ചാമിടത്തെ ചന്ദ്രന്റെ ദശാകാലത്ത് സന്താനലാഭവും (ചന്ദ്രന് പന്ത്രണ്ടാം ഭാവാധിപനാണെങ്കില് സന്താനം അല്പ്പായുസ്സായിരിക്കും) ഉദ്യോഗത്തില് ഉന്നതിയുമുണ്ടാകും. ആറ്, എട്ട്, പന്ത്രണ്ട് ഭാവങ്ങളില് നില്ക്കുന്ന ചന്ദ്രന്റെ ദശാകാലം പലവിധത്തിലും ദോഷപ്രദമായിരിക്കും. മാതൃദുരിതം, അന്യദേശവാസം, ദേഹസുഖക്കുറവ്, പലവിധ അനിഷ്ടങ്ങള് ഇവയൊക്കെ ഉണ്ടാകും. ഏഴ്, ഒന്പത്, പത്ത്, പതിനൊന്ന് ഭാവങ്ങളില് നില്ക്കുന്ന ചന്ദ്രന്റെ ദശാകാലത്ത് പലവിധ ഗുണാനുഭവങ്ങളും സിദ്ധിക്കും. മനസ്സുഖം ഉണ്ടാകുന്നതോടൊപ്പം ധനപരമായ മെച്ചങ്ങളും സിദ്ധിക്കും. മാതാവിനും ദശാകാലം നന്നായിരിക്കും. ഏഴാമിടത്ത് നില്ക്കുന്ന ചന്ദ്രന്റെ ദശാകാലത്ത് വിവാഹവും, ഒന്പതാമിടത്തെ ചന്ദ്രന്റെ ദശാകാലത്ത് ലോട്ടറി മുതലായവയിലൂടെ അപ്രതീക്ഷിത ധനലാഭവും പത്താമിടത്തെ ചന്ദ്രന്റെ ദശാകാലത്ത് ഉദ്യോഗത്തിലൂടെ ധനലാഭവും ഉണ്ടാകും. പതിനൊന്നാമിടത്തെ ചന്ദ്രന്റെ ദശാകാലത്ത് എന്താണോ ആഗ്രഹിക്കുന്നത് അത് നേടിയെടുക്കാന് ജാതകന് തീര്ച്ചയായും കഴിയും.
(ജ്യോതിഷസുധ എന്ന ഗ്രന്ഥത്തില് നിന്ന്)
