വയനാട്: മാനന്തവാടി സര്ക്കാര് മെഡിക്കല് കോളേജിലെ കാര്ഡിയാക് തൊറാസിക് സര്ജറി വിഭാഗം അസോസിയേറ്റ് പ്രൊഫസര് ഡോ. ശിവപ്രസാദിനെതിരെ വിജിലന്സ് അന്വേഷണം.ഗുരുതര ക്രമക്കേടുകള് കണ്ടെത്തിയ പശ്ചാത്തലത്തിലാണ് ഇത്.
സര്ക്കാര് മെഡിക്കല് കോളേജില് നിന്ന് മാസം മൂന്ന് ലക്ഷം രൂപയോളം ശമ്പളം പറ്റുന്നുണ്ട് ഡോ ശിവപ്രസാദ്. ഇതിന് പുറമെ സ്വകാര്യ ആശുപത്രിയായ കോട്ടക്കല് ആസ്റ്റര് മിംസിലും പ്രാക്ടീസ് നടത്തി വരികയായിരുന്നു എന്നാണ് കണ്ടെത്തിയത്.
ആസ്റ്റര് മിംസ് ആശുപത്രിയില് നിന്ന് മാത്രം മാസം ഏഴ് ലക്ഷത്തോളം രൂപയാണ് ഡോ ശിവപ്രസാദ് പ്രതിഫലമായി വാങ്ങിയിരുന്നത്.
സംസ്ഥാനത്തെ സര്ക്കാര് ഡോക്ടര്മാരുടെ സ്വകാര്യ പ്രാക്ടീസിനെതിരെ വിജിലന്സ് നിരീക്ഷണം ശക്തമാക്കുന്നതിന്റെ ഭാഗമായാണ് നടപടി. നിലവില് വിവിധ സ്വകാര്യ ആശുപത്രികളിലായി നിയമവിരുദ്ധമായി പ്രാക്ടീസ് നടത്തിവരുന്ന ഇരുനൂറോളം സര്ക്കാര് ഡോക്ടര്മാര് വിജിലന്സിന്റെ നിരീക്ഷണത്തിലാണ്.വരും ദിവസങ്ങളില് കൂടുതല് ഡോക്ടര്മാര്ക്കെതിരെ കര്ശനമായ റെയ്ഡുകളും നിയമനടപടികളും ഉണ്ടാകുമെന്നാണ് സൂചന.
