ന്യൂഡൽഹി : ഇന്ത്യയ്ക്ക് അഞ്ചാം തലമുറ യുദ്ധവിമാനമായ എസ് യു -57 നൽകാമെന്ന് റഷ്യൻ പ്രസിഡന്റ് വ്ലാഡിമിർ പുടിൻ. എസ് യു 57 ഇന്ത്യയുമായി ചേർന്ന് നിർമ്മിക്കാനും, ഇന്ത്യയ്ക്ക് അതിന്റെ സാങ്കേതിക വിദ്യകൾ കൈമാറാൻ തയ്യാറാണെന്നും പുതിൻ വ്യക്തമാക്കി .
നിലവിൽ ഇന്ത്യൻ സേനയ്ക്ക് അഞ്ചാം തലമുറ യുദ്ധവിമാനമില്ല . ഇന്ത്യ സ്വന്തമായി വികസിപ്പിക്കുന്ന അഡ്വാൻസ്ഡ് മീഡിയം കോംബാറ്റ് എയർക്രാഫ്റ്റ് പ്രവർത്തന സജ്ജമാക്കാൻ 2030 വരെ സമയമെടുക്കും . ഈ പശ്ചാത്തലത്തിലാണ് ഇന്ത്യ റഷ്യയിൽ നിന്ന് എസ് യു – 57, യുഎസിന്റെ എഫ് -35 എന്നിവ പരിഗണിക്കുന്നത്. ഇതിനിടെയാണ് ഇന്ത്യയ്ക്ക് പുടിന്റെ പുതിയ വാഗ്ദാനം.
‘ ഈ വിമാനം ഇന്ത്യയ്ക്ക് നൽകാനും , ഒരുമിച്ച് വികസിപ്പിക്കാനും ഞങ്ങൾ തയ്യാറാണ് . ഞങ്ങൾക്ക് യാതൊരു പ്രശ്നങ്ങളോ പരിമിതികളോ ഇല്ല . വ്യോമപ്രതിരോധ സംവിധാനങ്ങളുടെ കാര്യത്തിലും അങ്ങനെ തന്നെ ‘ – പുടിൻ പറഞ്ഞു.പാകിസ്താൻ ചൈനയുടെ ജെ-35എഇ സ്റ്റെൽത്ത് യുദ്ധവിമാനങ്ങൾ വാങ്ങാൻ ഒരുങ്ങുന്നതിനിടെയാണ് ഇന്ത്യ അഞ്ചാം തലമുറ യുദ്ധവിമാനം സ്വന്തമാക്കാൻ ഒരുങ്ങുന്നത് .
