ന്യൂദല്ഹി: ലൈംഗിക ബന്ധം നിഷേധിക്കുന്നത് വിവാഹത്തിന്റെ അടിത്തറയെ ദുര്ബലപ്പെടുത്തുമെന്ന് ആവര്ത്തിച്ച് സുപ്രിം കോടതി. ഗുജറാത്ത് സ്വദേശികളായ ഡോക്ടര് ദമ്പതികളുടെ വിവാഹബന്ധം വേര്പെടുത്താന് അനുമതി നല്കിയ ഹൈക്കോടതി വിധി ശരിവച്ചുകൊണ്ടാണ് സുപ്രിം കോടതി ഇക്കാര്യം വ്യക്തമാക്കിയത്.
ഒരുമിച്ച് താമസിച്ചിരുന്ന കാലയളവില് ഭാര്യ നേരത്തെ ഉറങ്ങുകയും മുറി അകത്തു നിന്ന് പൂട്ടുകയും ചെയ്തിരുന്നതായി കോടതിക്കു ബോധ്യപ്പെട്ടു. തങ്ങള് വെവ്വേറെ മുറികളിലാണ് ഉറങ്ങിയിരുന്നതെന്ന് ഭാര്യയും സമ്മതിച്ചു. ഒരുമിച്ച് താമസിച്ചിരുന്ന കാലയളവില് ഭാര്യ ദാമ്പത്യ ഉത്തരവാദിത്വങ്ങള് നിര്വഹിക്കുന്നതില് പരാജയപ്പെട്ടുവെന്നും വിവാഹമോചനത്തിനുള്ള കാരണമായി ആ ക്രൂരതയെ അംഗീകരിച്ച ഹൈക്കോടതിയുടെ വിധി ശരിയാണെന്നും ജസ്റ്റിസുമാരായ സഞ്ജയ് കരോള് , എ.ജി. മാസിഹ് എന്നിവരടങ്ങിയ ബെഞ്ച് വിലയിരുത്തി.
