തിരുവനന്തപുരം:പ്രതിപക്ഷ ഉപനേതാവ് പദവിയിലെ സി.പി.ഐ കടുംപിടിത്തത്തിന് പിന്നില്‍ എകെജി സെന്‍ററില്‍ നിന്നുള്ള നീക്കങ്ങളാണെന്ന് അണിയറ സംസാരം. ബിനോയ് വിശ്വത്തിന് പിന്നില്‍ ‘പിണറായിസമോ’ എന്ന ചോദ്യം ഉയരുകയാണ്.
നിയമസഭയിലെ പ്രതിപക്ഷ ഉപനേതാവ് സ്ഥാനത്തെച്ചൊല്ലി സി.പി.എമ്മും സി.പി.ഐയും തമ്മില്‍ ഉടലെടുത്ത തര്‍ക്കം കേവലം രണ്ട് പാര്‍ട്ടികള്‍ തമ്മിലുള്ള പദവി തര്‍ക്കമല്ലെന്ന സൂചനകളാണ് ഇപ്പോള്‍ പുറത്തുവരുന്നത്. ബിനോയ് വിശ്വത്തിന്റെ നേതൃത്വത്തില്‍ സി.പി.ഐ നടത്തുന്ന കടുംപിടിത്തത്തിന് പിന്നില്‍ എകെജി സെന്‍ററില്‍ നിന്നുള്ള ചില തിട്ടൂരങ്ങളാണോ എന്ന് സംശയിക്കപ്പെടുന്നു.
സാധാരണ നിലയില്‍ സഭയിലെ കക്ഷിനിലയും സീറ്റുകളുടെ എണ്ണവും പരിഗണിക്കുമ്പോള്‍ സി.പി.എമ്മിലെ മുതിര്‍ന്ന നേതാവും മുന്‍ ധനമന്ത്രിയുമായ കെ.എന്‍. ബാലഗോപാലാണ് പ്രതിപക്ഷ ഉപനേതാവാകേണ്ടത്. എന്നാല്‍ ബാലഗോപാലിന് ഈ പദവി നല്‍കാന്‍ എ.കെ.ജി സെന്ററിലെ ഒരു വിഭാഗം ഒട്ടും താല്പര്യപ്പെടുന്നില്ലെന്നാണ് വിവരം. സി.പി.ഐയെ മുന്നില്‍ നിര്‍ത്തി സമ്മര്‍ദ്ദം ചെലുത്തുന്നതിലൂടെ ബാലഗോപാലിന്റെ രാഷ്‌ട്രീയ വളര്‍ച്ചയ്‌ക്ക് തടയിടാന്‍ പ്രതിപക്ഷ നേതാവ് പിണറായി വിജയന്‍ തന്നെ കരുക്കള്‍ നീക്കുന്നുണ്ടോ എന്നും സംശയിക്കപ്പെടുന്നു.
സി.പി.എം കേന്ദ്ര കമ്മിറ്റി അംഗമായ കെ.എന്‍. ബാലഗോപാലിനെ പ്രതിപക്ഷ ഉപനേതാവാക്കുന്നതിലൂടെ പാര്‍ട്ടിയിലും സഭയിലും അദ്ദേഹത്തിന്റെ പ്രസക്തിയും സ്വാധീനവും വര്‍ധിക്കും. സഭയില്‍ പ്രതിപക്ഷ നേതാവിന് തൊട്ടുപിന്നാലെയുള്ള ഈ പദവി ലഭിക്കുന്നത് ഭാവിയില്‍ ബാലഗോപാലിന് പാര്‍ട്ടി പോളിറ്റ് ബ്യൂറോയിലേക്ക് അടക്കം എളുപ്പത്തില്‍ വഴിതുറക്കാനുള്ള സാധ്യതകള്‍ വര്‍ദ്ധിപ്പിക്കുന്നതാണ്. ഇതിനെല്ലാം തടയിടാനാണ് ശ്രമം.
