കാഠ്മണ്ഡു: നേപ്പാളും ഇന്ത്യയുടെ ഭൂമി കയ്യേറിയിട്ടുണ്ടാകാം എന്ന പ്രസ്താവന നടത്തിയ നേപ്പാള്‍ പ്രധാനമന്ത്രി ബാലെന്‍ ഷാ രാജിവെയ്‌ക്കണമെന്ന് ആവശ്യപ്പെട്ട് നേപ്പാളിലെ പ്രതിക്ഷപാര്‍ട്ടികള്‍ ഒറ്റക്കെട്ടായി പ്രക്ഷോഭം തുടങ്ങി. നേപ്പാള്‍ പാര്‍ലമെന്‍റില്‍ ഞായറാഴ്ച ഇന്ത്യാ നേപ്പാള്‍ അതിര്‍ത്തിയെക്കുറിച്ച് നടന്ന ഒരു ചര്‍ച്ചയിലാണ് നേപ്പാളും ഇന്ത്യയുടെ ഭൂമി കയ്യേറിയെന്ന വിവാദ പ്രസ്താവന പ്രധാനമന്ത്രി ബാലെന്‍ ഷാ നടത്തിയത്.
ഇക്കാര്യം ചരിത്രകാരന്മാരെയും സര്‍വ്വേയര്‍മാരെയും വിദഗ്ധരെയും ഉപയോഗപ്പെടുത്തി തിട്ടപ്പെടുത്തേണ്ടതുണ്ടെന്നും ഇതിന് യുകെയുടെ കയ്യിലുള്ള കൊളോണിയല്‍ ഭരണകാലത്തെ ഭൂപടം വരെ ഉപയോഗിക്കേണ്ടിവരുമെന്നും ബാലെന്‍ ഷാ പ്രസ്താവിച്ചിരുന്നു. എന്നാല്‍ ഈ പ്രസ്താവന ദീര്‍ഘകാലമായി നേപ്പാള്‍ ഭരിച്ചിരുന്ന പ്രതിപക്ഷപാര്‍ട്ടികളുടെ നേതാക്കള്‍ക്ക് രുചിച്ചില്ല. ഇവര്‍ ഒറ്റക്കെട്ടായി നിന്ന് ബാലെന്‍ ഷാ രാജിവെയ്‌ക്കണമെന്ന ആവശ്യമുയര്‍ത്തി പ്രക്ഷോഭം ആരംഭിച്ചിരിക്കുകയാണ്. നേരത്തെ നേപ്പാള്‍ കമ്മ്യൂണിസ്റ്റ് പാര്‍ട്ടി നേതാവ് കെ.പി. ശര്‍മ്മ ഒലി പ്രധാനമന്ത്രിയായപ്പോള്‍ ഉണ്ടായ വിദ്യാര്‍ത്ഥി കലാപമാണ് അന്നത്തെ സര്‍ക്കാരിനെ താഴെയിറക്കിയത്. ഇപ്പോള്‍ അതിന് സമാനമായ കലാപമാണ്ട് ഉയരുന്നത്.
കഴിഞ്ഞ മാസം ഇന്ത്യയില്‍ നിന്നും നേപ്പാളിലേക്ക് വരുന്ന സാധനങ്ങള്‍ക്ക് മേല്‍ തീരുവ ചുമത്തിയ ബാലെന്‍ ഷായുടെ നടപടിയ്‌ക്കെതിരെയും രോഷം ഉയര്‍ന്നിരുന്നു.
അതേ സമയം ഇന്ത്യ-നേപ്പാള്‍ അതിര്‍ത്തിപ്രശ്നം പരിഹരിക്കാന്‍ ഒരു മൂന്നാം രാജ്യത്തിന്റെ മധ്യസ്ഥത ആവശ്യമില്ലെന്ന് ഇന്ത്യയുടെ വിദേശകാര്യമന്ത്രാലയം കഴിഞ്ഞ ദിവസം ആഞ്ഞടിച്ചിരുന്നു. കാലാപാന, ലിപുലേഖ്, ലിംപിയാദുര തുടങ്ങിയ പ്രദേശങ്ങള്‍ ഇന്ത്യയുടേതാണെന്ന കാര്യത്തില്‍ ഒരു വിട്ടുവീഴ്ചയ്‌ക്കും തയ്യാറില്ലെന്ന് ഇന്ത്യ നേരത്തെ വ്യക്തമാക്കിയിരുന്നു.
