കൊട്ടാരക്കര: മെക്‌സിക്കോ സിറ്റിയിലെ പ്രശസ്തമായ എസ്റ്റാഡിയോ അസ്റ്റെക്ക സ്റ്റേഡിയത്തില്‍ ഈ മാസം 11ന് ഫിഫ വേര്‍ഡ് കപ്പ് ഫുട്‌ബോളിന്റെ ആദ്യ മത്സരത്തിന്റെ പന്തുരുളും. ലോകം ഫുട്‌ബോള്‍ മാമാങ്കത്തെ നെഞ്ചേറ്റാന്‍ ദിവസങ്ങള്‍ മാത്രം ബാക്കി നില്‍ക്കെ കുളക്കട ഗ്രാമവും ഫുട്‌ബോള്‍ ആവേശത്തിലാണ്.
കുളക്കട തുരുത്തീലമ്പലം ജങ്ഷനിലെ റോഡിന്റെ ഇരു വശങ്ങളിലും വിവിധ രാജ്യങ്ങളുടെ ഫുട്ബാള്‍ ടീമിന്റെയും താരങ്ങളുടയും കൂറ്റന്‍ ഫ്ലക്‌സ് ബോര്‍ഡുകള്‍ ഉയര്‍ന്നു കഴിഞ്ഞു. ബ്രസീലിന്റെ കോച്ച് കാര്‍ലോ ആഞ്ചലോട്ടി തുടങ്ങി നെയ്‌മറും, ആലിസണും, വിനീഷ്യസ് ഉള്‍പ്പടെ എല്ലാ കളിക്കാരുടേയും മെസിയുടെയും ക്രിസ്ത്യാനോ റോണാള്‍ഡോയുടെയും ഉള്‍പ്പെടെയുള്ളവരുടെ പ്രത്യേക ബോര്‍ഡുകള്‍ അടുപ്പിച്ചടുപ്പിച്ച് സ്ഥാപിച്ചിരിക്കുന്നു. അര്‍ജന്റീന, പോര്‍ച്ചുഗല്‍, ജര്‍മനി, ഫ്രാന്‍സ്, സ്‌പെയിന്റെയുമെല്ലാം ബോര്‍ഡുകള്‍ സ്ഥാനം പിടിച്ചു കഴിഞ്ഞു. അണിയറയില്‍ കൂടുതല്‍ അലങ്കാര പണികള്‍ ലോകകപ്പിന് വേണ്ടി ഒരുങ്ങുന്നുണ്ട്.
കുളക്കട എംഎഫ്‌സി ക്ലബ്ബിലെ അംഗങ്ങളാണ് അവരവര്‍ക്ക് ഇഷ്ടമുള്ള ടീമിന്റെയും താരങ്ങളുടെയും ബോര്‍ഡുകള്‍ ഉയര്‍ത്തിയിരിക്കുന്നത്. ഉദ്ഘാടന മത്സര തലേന്ന് കുളക്കട പഞ്ചായത്തില്‍ ലോകകപ്പ് ആവേശമായി റോഡ് ഷോ ഉള്‍പ്പടെ നടത്താനാണ് ഫുട്‌ബോള്‍ പ്രേമികള്‍ ലക്ഷ്യമിടുന്നത്. കളി തുടങ്ങുംമുന്നേ തന്നെ വാഗ്വാദങ്ങളും തുടങ്ങി കഴിഞ്ഞു. 94 അമേരിക്കയില്‍ കപ്പ് ബ്രസീല്‍ നേടിയത് പോലെ ഇത്തവണയും ബ്രസീല്‍ കപ്പ് തൂക്കുമെന്നും നെയ്‌മര്‍ കൂടുതല്‍ കരുത്തോടെ ടീമില്‍ ഉള്ളതും ആത്മവിശ്വാസം വര്‍ദ്ധിപ്പിക്കുന്നുവെന്നുമാണ് ബ്രസീല്‍ ആരാധകര്‍ പറയുന്നത്.
ഇത്തവണ കപ്പ് ബ്രസീല്‍ നേടിയാല്‍ ആറു തവണ നേടിയ രാജ്യമായി ബ്രസീല്‍ മാറും. ഇതിഹാസ താരം ലയണല്‍ മെസ്സി അര്‍ജന്റീനയെ നയിക്കുന്നതിന്റെ ആത്മവിശ്വാസത്തിലാണ് അര്‍ജന്റീനി യന്‍ ആരാധകര്‍. ക്രിസ്ത്യാനോ റോണാള്‍ഡോയുടെ പോര്‍ച്ചുഗല്‍ ഇത്തവണ കപ്പ് തൂക്കുമെന്ന് പോര്‍ച്ചുഗല്‍ ആരാധകരും പറയുന്നു. ജര്‍മ്മനിയുടെയും ഫ്രാന്‍സിന്റെയുമെല്ലാം ആരാധകരും തങ്ങളുടെ ടീമിന് പിന്തുണയുമായി രംഗത്തുണ്ട്. ജൂണ്‍ 11 മുതല്‍ ജൂലൈ 19 വരെയാണ് ലോകകപ്പ് മത്സരങ്ങള്‍.
ജന്മഭൂമി ഓണ്‍ലൈന്‍