ആലപ്പുഴ: എംഎല്‍എമാരുടെ രാജാവാകാന്‍ ജി. സുധാകരന്‍ നോക്കേണ്ടെന്ന് കുട്ടനാട് എംഎല്‍എ റെജി ചെറിയാന്‍.തനിക്കെതിരെയുള്ള ജി. സുധാകരന്റെ പരാമര്‍ശം യുഡിഎഫ് നേതൃത്വത്തെ അറിയിക്കും.അദ്ദേഹം രാജാവായിരുന്ന കാലമൊക്കെ പോയി.
ഈ പറഞ്ഞ മഹാന്‍ മന്ത്രി ആയിരുന്ന കാലത്ത് തോട്ടപ്പള്ളിയില്‍ നിന്ന് കരിമണല്‍ കൊണ്ടുപോയിരുന്നു. അന്ന് മണ്ണുകൊണ്ടുപോയത് എങ്ങോട്ടാണെന്ന് ഭരിച്ചവര്‍ക്കാണ് അറിയാവുന്നത്.ആരുടെയും കൈയില്‍ നിന്ന് പേപ്പര്‍ എഴുതി വാങ്ങിയിട്ടല്ല താന്‍ എംഎല്‍എയായത്?. കുട്ടനാട്ടിലെ ജനങ്ങള്‍ വോട്ട് ചെയ്താണ് വിജയിച്ചത്- റെജി ചെറിയാന്‍ പറഞ്ഞു.
തന്റെ സ്ഥാപനത്തില്‍ കള്ളുകുടിക്കാന്‍ ആരെങ്കിലും വന്നിട്ടുണ്ടെങ്കില്‍ ആ പാര്‍ട്ടിക്ക് അതിന്റെ പ്രയോജനവും ഉണ്ടായിക്കാണും.ജി. സുധാകരന്‍ ഇപ്പോള്‍ യുഡിഎഫില്‍ ആണെന്ന് അദ്ദേഹത്തിന് മനസിലായിട്ടില്ല.
തന്റെ മണ്ഡല പരിധിയിലുളള തോട്ടപ്പളളി സ്പില്‍വേയില്‍ റെജി ചെറിയാന്‍ സന്ദര്‍ശനം നടത്തിയതാണ് ജി സുധാകരനെ പ്രകോപിപ്പിച്ചത്.നിയമസഭയുടെ പ്രിവിലജ് കമ്മിറ്റിയില്‍ പരാതിപ്പെട്ടാല്‍ റെജി ചെറിയാന്‍ ശിക്ഷിക്കപ്പെടുമെന്നും ഒരു എം എല്‍എയ്‌ക്ക് മുകളില്‍ മറ്റൊരാള്‍ അധികാരം സ്ഥാപിക്കാന്‍ ശ്രമിക്കുന്നതാണ് ഉണ്ടായതെന്നും ജി സുധാകരന്‍ പറഞ്ഞു.
