തിരുവനന്തപുരം: മായാവി’യിലെ സുഗുണനായും ‘കീർത്തിചക്ര’യിലെ കിഷോരിലാലായും നമ്മളെ വിസ്മയിപ്പിച്ച സന്തോഷ് ജോഗി അത്ര വേഗം നമ്മൾ മറക്കുന്ന മുഖമല്ല. പക്ഷേ അദ്ദേഹം ജീവിതം അവസാനിപ്പിക്കുമ്പോൾ വെറും 25 വയസ്സ് മാത്രമുണ്ടായിരുന്ന ഭാര്യ ജിജി നേരിട്ടത് സങ്കൽപ്പിക്കാൻ പോലും പറ്റാത്ത പ്രതിസന്ധികളായിരുന്നു.
കടങ്ങളും ജപ്തി നോട്ടീസും ഒരു വശത്ത്, കയ്യിൽ പറക്കമുറ്റാത്ത രണ്ട് പെൺകുഞ്ഞുങ്ങളും രോഗിയായ അമ്മയും മറുവശത്ത്. ആരെങ്കിലും ഒന്ന് തളർന്നു പോകുന്ന അവസ്ഥ! പക്ഷേ വിധിയെ പഴിച്ചിരിക്കാൻ ആ പെൺകുട്ടി തയ്യാറല്ലായിരുന്നു. കടം വീട്ടാൻ വേണ്ടി സ്വന്തം വീട് വിറ്റ് ഇറങ്ങേണ്ടി വന്നിട്ടും, വാടകവീട്ടിലെ പരിമിതികളിൽ നിന്ന് അവൾ ജീവിതത്തോട് പൊരുതാൻ തീരുമാനിച്ചു.
ഫാർമസിയിലെ ജോലിയും കഴിഞ്ഞ് രാത്രി വൈകുവോളം ട്യൂഷൻ എടുത്തും ഓൺലൈൻ ജോലികൾ ചെയ്തും ജിജി അധ്വാനിച്ചു. സ്വന്തം മക്കളുടെ വളർച്ച പോലും കാണാൻ പറ്റാത്ത അത്രയും തിരക്കിലായിരുന്നു ആ ജീവിതം. ഒരു ദിവസം 20 മണിക്കൂറോളം ജോലി ചെയ്താണ് ആ തകർച്ചയിൽ നിന്ന് ജിജി കരകയറിയത്.
വർഷങ്ങൾ നീണ്ട കഠിനാധ്വാനം കൊണ്ട് കടങ്ങളെല്ലാം വീട്ടി, പണി തീരാത്ത വീട്ടിലേക്ക് താമസം മാറി, പതുക്കെ പതുക്കെ ആ സ്വപ്നക്കൂട് ജിജി പൂർത്തിയാക്കി. അവിടെയും തീർന്നില്ല, പുസ്തകങ്ങളോടുള്ള ഇഷ്ടം കൊണ്ട് സ്വന്തമായി ഒരു പബ്ലിഷിംഗ് ഹൗസ് വരെ തുടങ്ങി ഇന്ന് അവർ വിജയിച്ചു നിൽക്കുന്നു. തളർന്നു പോകാൻ ആയിരം കാരണങ്ങൾ ഉണ്ടായിട്ടും തന്റേടത്തോടെ പൊരുതി ജയിച്ച ജിജി, തോറ്റുപോകാമെന്ന് കരുതുന്ന ഏതൊരു പെൺകുട്ടിക്കും വലിയൊരു പ്രചോദനമാണ്! ജിജിക്ക് ഒരു ബിഗ് സല്യൂട്ട്!
