കോഴിക്കോട്: ഭാരത സര്‍ക്കാര്‍ നിരോധിച്ച മതഭീകര സംഘടനയായ പോപ്പുലര്‍ ഫ്രണ്ട് ഓഫ് ഇന്ത്യയെ പുനരുജ്ജീവിപ്പിക്കാന്‍ യങ് ഡെമോക്രാറ്റ്‌സ് എന്ന പുതിയ യുവജന സംഘടന സജീവമാകുന്നു. പോപ്പുലര്‍ ഫ്രണ്ടിന്റെ രാഷ്‌ട്രീയ സംഘടനയായ എസ്ഡിപിഐയുടെ യുവജന സംഘടന എന്ന നിലയിലാണ് കഴിഞ്ഞ ജനുവരിയില്‍ മംഗലാപുരത്ത് യങ് ഡെമോക്രാറ്റ്‌സിന് രൂപം നല്‍കിയത്.
മുസ്ലിം യുവാക്കളെ രാഷ്‌ട്രവിരുദ്ധ പ്രവര്‍ത്തനങ്ങളിലേക്ക് വഴിതിരിച്ചുവിടുകയാണ് സംഘടനയുടെ മുഖ്യലക്ഷ്യമെന്നാണ് രഹസ്യാന്വേഷണ വിഭാഗത്തിന് ലഭിച്ച സൂചന. യുവാക്കളെ ആകര്‍ഷിക്കുന്നതിന് ദളിത് വിഷയങ്ങളും മറ്റും ഏറ്റെടുത്ത് പ്രവര്‍ത്തിക്കാനാണ് സംഘടനയുടെ തീരുമാനം.
മെയ് 15ന് ദല്‍ഹിയില്‍ നടത്തിയ ദേശീയ കൂടിച്ചേരലിന് ശേഷം കേരളത്തിലെ ഓരോ ജില്ലയിലും ജില്ലാ അസംബ്ലികള്‍ വിളിച്ചുചേര്‍ത്തു വരികയാണ്. മെയ് 20ന് തുരുവനന്തപുരത്ത് അസംബ്ലി നടത്തി. കഴിഞ്ഞദിവസം ഒറ്റപ്പാലത്ത് പാലക്കാട് ജില്ല അസംബ്ലിയും നടത്തി. ഈ സമ്മേളനങ്ങളില്‍ പ്രാസംഗികരായും ഭാരവാഹികളായും ചില ഹിന്ദു നാമധാരികളും രംഗത്തുണ്ട്.
കേരളത്തിലെ ഇടത്-വലത് മുന്നണികളുടെ നിര്‍ലോഭമായ പിന്തുണ ലഭിക്കുന്നതിനാല്‍ കേരളത്തില്‍ പുതിയ സംഘടനയുടെ പ്രവര്‍ത്തനം ശക്തമാക്കി, നിരോധനത്തിന് ശേഷം ഒളിപ്രവര്‍ത്തനം മാത്രമുള്ള പോപ്പുലര്‍ ഫ്രണ്ടിനെ മുഖംമൂടിയിട്ട് രംഗത്തെത്തിക്കാനുള്ള നീക്കമാണ് നടക്കുന്നത്. പോപ്പുലര്‍ ഫ്രണ്ടിന് കാമ്പസ് ഫ്രണ്ട് എന്ന പേരില്‍ വിദ്യാര്‍ത്ഥി- യുവജന വിഭാഗം ഉണ്ടായിരുന്നു.
