മുംബൈ: ആരാണ് കല്‍ക്കി? എന്തിനാണ് കല്‍ക്കി വരുന്നത്? കല്‍ക്കി എന്നത് ഈ കലിയുഗത്തില്‍ മഹാവിഷ്ണു എടുക്കുന്ന പത്താമത്തെ അവതാരരൂപമാണ്. എന്താണ് അവതാരം? ധര്‍മ്മത്തിന് ക്ഷയം സംഭവിക്കുമ്പോള്‍ അതിനെ സ്ഥാപിക്കാന്‍ വരുന്ന ശക്തിയാണ് അവതാരം. ഇതുവരെ ഒന്‍പത് അവതാരങ്ങളാണ് ഭഗവാന്‍ കൈക്കൊണ്ടിരിക്കുന്നത്. മത്സ്യമായും കൂര്‍മ്മമായും വരാഹമായും നരസിംഹമായും ശ്രീരാമനായും കൃഷ്ണനായും ഒമ്പതോളം അവതാരങ്ങള്‍ ഇവിടെ എത്തി.
ഇത് കലിയുഗമാണ്. യുഗങ്ങളില്‍ വെച്ച് ഏറ്റവും മോശമായ, നന്മയും ധര്‍മ്മചിന്തയും സത്യസന്ധതയും ഇല്ലാത്ത ഇരുണ്ട കാലമായി ഈ കലിയുഗത്തെ കരുതപ്പെടുന്നു. ഈ യുഗത്തിലെ കാലുഷ്യത്തിനും അധപതനത്തിനും അന്ത്യമേകാന്‍ വരുന്ന അവതാരമാണ് കല്‍ക്കി. ഭഗവാന്‍ വിഷ്ണുവിന്റെ പത്താമത്തെ അവതാരം.
ദേവദത്തനെന്ന വെള്ളക്കുതിരപ്പുറത്ത് കയ്യില്‍ തിളങ്ങുന്ന വാളും ചക്രവും ഉള്ള മനോഹരരൂപനാണ് കല്‍ക്കി. കലിയുഗത്തിന്റെ അധിപനായ കലിയെ തോല്‍പിക്കുകയാണ് കല്‍ക്കിയുടെ ദൗത്യം. അത് നടക്കുമോ? ഭാരതം ആ കല്‍ക്കിക്കായി കാത്തിരിക്കുകയാണ്. അധര്‍മ്മം കൊടികുത്തിവാഴുന്ന കലിയുഗം തീരുന്നതോടെ സത്യയുഗം ആരംഭിയ്‌ക്കും. അതിനായി കാതോര്‍ക്കുകയാണ് ഭാരതം.
