ന്യൂദല്‍ഹി: കേരളത്തിലെ വഖഫ് ബോര്‍ഡ് ഉമീദ് പോര്‍ട്ടലില്‍ മുനമ്പം ഭൂമി ഉള്‍പ്പെടുത്തിയ നടപടി റദ്ദാക്കാനാവശ്യപ്പെട്ട് കേന്ദ്രന്യൂനപക്ഷകാര്യമന്ത്രാലയത്തെ സമീപിച്ച് ബിജെപി. തര്‍ക്കഭൂമി വഖഫ് രേഖകളില്‍ ഉള്‍പ്പെടുത്തിയത് നിയമവിരുദ്ധമായാണെന്നും നടപടി റദ്ദാക്കി ഭൂമി പഴയപോലെ ആക്കി മാറ്റാന്‍ ഇടപെടണമെന്നുമാവശ്യപ്പെട്ട് കേന്ദ്രന്യൂനപക്ഷകാര്യമന്ത്രി കിരണ്‍ റിജിജുവിന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ എംഎല്‍എ നിവേദനം നല്‍കി.
വഖഫ് ഭൂമി സംബന്ധിച്ച രേഖകള്‍ ഊമീദ് പോര്‍ട്ടലില്‍ ഉള്‍പ്പെടുത്തേണ്ട ചുമതല മുത്താവലിക്കാണ്. എന്നാല്‍ കേരളത്തിലെ വഖഫ് ബോര്‍ഡ് സ്വയം മുത്താവലി ചമഞ്ഞ് രേഖകള്‍ ഉള്‍പ്പെടുത്തിയ നടപടി കേന്ദ്രന്യൂനപക്ഷമന്ത്രാലയം റദ്ദ് ചെയ്യണം. വഖഫ് നിയമത്തിലെ 3 ബി വകുപ്പിന്റെ ലംഘനമാണ് കേരളത്തിലെ വഖഫ് ബോര്‍ഡ് ചെയ്തത്. അതിനാല്‍ തന്നെ ഉമീദ് നിയമത്തിന്റെ സെക്ഷന്‍ 96 അടക്കമുള്ള വകുപ്പുകള്‍ പ്രകാരം മുനമ്പം ഭൂമിയുടെ രേഖകള്‍ പോര്‍ട്ടലില്‍ നിന്ന് നീക്കം ചെയ്യണമെന്നും രാജീവ് ചന്ദ്രശേഖര്‍ എംഎല്‍എ കേന്ദ്രന്യൂനപക്ഷകാര്യമന്ത്രിയോട് ആവശ്യപ്പെട്ടു.
