ആലപ്പുഴ: സിപിഎമ്മിനെ തകര്ക്കുന്നത് പാര്ട്ടിയുടെ മുകളിലിരിക്കുന്നവരാണെന്ന് ജി. സുധാകരന് എംഎല്എ.സിപിഎമ്മില് ആത്മവിമര്ശനമൊന്നുമില്ല. അത് വെറുതെ പറയുന്നതാണ്. സിപിഎമ്മില് നില്ക്കാന് കൊള്ളാത്തതുകൊണ്ടാണ് താന് അംഗത്വം പുതുക്കാതിരുന്നതെന്ന് അദ്ദേഹം പറഞ്ഞു.
കേരള വ്യാപാരി വ്യവസായി ഏകോപന സമിതി അമ്പലപ്പുഴ ടൗണ് യൂണിറ്റ് വാര്ഷിക പൊതുയോഗ വേദിയിലാണ് സിപിഎമ്മിനെ ജി സുധാകരന് വീണ്ടും വിമര്ശിച്ചത്.
ഞങ്ങള് ചേര്ന്ന കാലത്തെ പാര്ട്ടിയല്ല ഇത്. പാര്ട്ടിയെന്ന പേര് മാത്രമേയുള്ളൂ. പൈസയുണ്ടാക്കുക, ശാപ്പാടടിക്കുക, രാജ്യം മുഴുവന് ചുറ്റി സഞ്ചരിക്കുക. ഇതാണ് നടക്കുന്നത്- സുധാകരന് പറഞ്ഞു.
സിപിഎം സ്ഥാനാര്ഥികള് ചിലയിടത്ത് ജയിച്ചത് ഭാഗ്യമെന്നു കരുതിയാല് മതി. വിജയരാഘവന് തനിക്കെതിരെ പ്രസംഗിച്ചത് കൊണ്ട് കൂടുതല് വോട്ട് കിട്ടി. പ്രസംഗിച്ചാലൊന്നും വോട്ട് കിട്ടില്ല. അധികാരത്തിലിരിക്കുമ്പോള് ജനങ്ങള്ക്കു വേണ്ടി പ്രവര്ത്തിക്കണമെന്ന് സുധാകരന് ചൂണ്ടിക്കാട്ടി.
2021ല് സിപിഎമ്മിന് 47 ശതമാനം വോട്ട് കിട്ടി. ഇപ്പോള് അത് 26 ശതമാനമായി കുറഞ്ഞു.അസാമാന്യമായ കഴിവാണ് ഇത്. ചെങ്ങന്നൂരില് നല്ല സ്ഥാനാര്ഥിയെ നിര്ത്തിയിരുന്നെങ്കില് കോണ്ഗ്രസ് രാവിലെ ഒന്പതിന് തന്നെ ജയിച്ചേനെ. അവിടെ എല്ഡിഎഫ് സ്ഥാനാര്ഥി പറഞ്ഞയാളെയാണ് യുഡിഎഫ് സ്ഥാനാര്ഥിയാക്കിയതെന്നും ഇത് കോണ്ഗ്രസ് പരിശോധിക്കണമെന്നും സുധാകരന് പറഞ്ഞു.
