തിരുവനന്തപുരം : വോട്ട് ബാങ്ക് രാഷ്ട്രീയത്തിന്റെ ബലത്തിലാണ് കോണ്ഗ്രസ്-യു.ഡി.എഫ്. സഖ്യം അധികാരത്തിലേറിയ ഉടന് തന്നെ, മുനമ്പത്തെ ഭൂമി ‘ഉമീദ്’ പോര്ട്ടലില് രജിസ്റ്റര് ചെയ്തിരിക്കുന്നതെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് പറഞ്ഞു. കേരള വഖഫ് ബോര്ഡിന് തങ്ങളുടെ യജമാനന്മാര് ആരാണെന്ന് കൃത്യമായി അറിയാമെന്നും രാജീവ് ചന്ദ്രശേഖര് പ്രസ്താവിച്ചു.
നരേന്ദ്ര മോദി സര്ക്കാരും രണ്ട് കേന്ദ്രമന്ത്രിമാരും നാല് എം.പി.മാരും മൂന്ന് എം.എല്.എ.മാരും അടക്കമുള്ള ജനപ്രതിനിധികളും 30 ലക്ഷം മലയാളി വോട്ടര്മാരും അടിയുറച്ച പിന്തുണയുമായി കൂടെയുള്ളപ്പോള് മുനമ്പത്തെ ഒരിഞ്ച് ഭൂമി പോലും ആര്ക്കും വിട്ടുകൊടുക്കില്ല. ജമാഅത്തെ ഇസ്ലാമിയും എസ്.ഡി.പി.ഐ.യും പിന്നില് നിന്ന് നിയന്ത്രിക്കുന്ന, നട്ടെല്ലില്ലാത്ത കോണ്ഗ്രസിന് എല്ലാ മലയാളികള്ക്കും വേണ്ടി നിലകൊള്ളാന് ഒരിക്കലുമാവില്ല. അവര് അതിന് തയാറാവുകയുമില്ല. ഇത് വെറുമൊരു ഭൂമി തര്ക്കം മാത്രമല്ല. ആരാണ് യഥാര്ത്ഥത്തില് മലയാളികള്ക്കൊപ്പം നില്ക്കുന്നതെന്ന് തിരിച്ചറിയാനുള്ള സമയം കൂടിയാണിത്. ആരാണ് തങ്ങള്ക്കൊപ്പം അടിയുറച്ച് നിലകൊള്ളുന്നതെന്ന് മുനമ്പത്തെ ജനങ്ങള്ക്ക് കൃത്യമായി അറിയാമെന്നും രാജീവ് ചന്ദ്രശേഖര് പറഞ്ഞു.
