കോട്ടയം: നടന്‍ മമ്മൂട്ടി, നാദസ്വര വിദ്വാന്‍ തിരുവിഴ ജയശങ്കര്‍, വാസ്‌കുലര്‍ സര്‍ജന്‍ ഡോ. എന്‍. രാധാകൃഷ്ണന് എന്നിവര്‍ക്ക് മഹാത്മാഗാന്ധി സര്‍വകലാശാലയുടെ ഓണററി ഡോക്ടറേറ്റ് സമര്‍പ്പണം നാളെ.
തിങ്കളാഴ്ച രാവിലെ 9.30ന് സര്‍വകലാശാലാ അസംബ്ലി ഹാളില്‍ നടക്കുന്ന ചടങ്ങില്‍ ചാന്‍സലര്‍ രാജേന്ദ്ര വിശ്വനാഥ ആര്‍ലേക്കര്‍ ബിരുദദാനം നിര്‍വഹിക്കും. പ്രോ-ചാന്‍സലര്‍ കൂടിയായ ഉന്നത വിദ്യാഭാസ വകുപ്പ ്മന്ത്രി റോജി എം. ജോണ്‍ അധ്യക്ഷനാകും.
മമ്മൂട്ടിക്കും തിരുവിഴ ജയശങ്കറിനും ഡോക്ടര്‍ ഓഫ് ലെറ്റേഴ്‌സ്, ഡോ. എന്‍. രാധാകൃഷ്ണന് ഡോക്ടര്‍ ഓഫ് സയന്‍സ് ബിരുദങ്ങളാണ് നല്‍കുക. വിസി ഡോ. സി.ടി. അരവിന്ദകുമാര്‍, രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍, സെനറ്റ്- സിന്‍ഡിക്കേറ്റ്- അക്കാദമിക് കൗണ്‍സില്‍ അംഗങ്ങള്‍ തുടങ്ങിയവര്‍ പങ്കെടുക്കും. തുടര്‍ന്ന് സെനറ്റ് ഹാളില്‍ തിരുവിഴ ജയശങ്കറിന്റെ നാദസ്വരക്കച്ചേരിയുമുണ്ട്.
വാര്‍ത്താസമ്മേളനത്തില്‍ വൈസ് ചാന്‍സലര്‍ ഡോ. സി.ടി. അരവിന്ദകുമാര്‍, സിന്‍ഡിക്കേറ്റ് അംഗം ഡോ. ജോജി അലക്‌സ്, രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍ എന്നിവര്‍ പങ്കെടുത്തു.
