ന്യൂദല്ഹി: ഭാരതത്തില് ലോകകപ്പ് ഫുട്ബോള് 2026 സംപ്രേഷണത്തിന് ധാരണയായതായി റിപ്പോര്ട്ട്. ഫിഫയുടെ ബ്രോഡ്കാസ്റ്റിങ് പാര്ട്ട്ണര്മാരായി ജിയോ ഹോട്സ്റ്റാറും സീ എന്റര്ടെയ്ന്മെന്റും ധാരണയിലെത്തിയതായാണ് പ്രമുഖ ദേശീയ മാധ്യമം റിപ്പോര്ട്ട് ചെയ്തത്.
കഴിഞ്ഞ തവണത്തെ ഖത്തര് ലോകകപ്പ് ബ്രോഡ്കാസ്റ്റ് ചെയ്തത് ജിയോ ഹോട്സ്റ്റാര് ആയിരുന്നു. വാര്ത്ത വാസ്തവമെങ്കില് 12 വര്ഷത്തെ ഇടവേളയ്ക്ക് ശേഷം സീ എന്റര്ടെയ്ന്മെന്റ് വീണ്ടും സ്പോര്ട്സ് തത്സമയ സംപ്രേഷണത്തിലേക്ക് തിരികെയെത്തുകയാണ്. 12 വര്ഷം മുമ്പാണ് സീ കായിക ഇനങ്ങളും സംപ്രേഷണം ചെയ്തിരുന്നത്. ഫിഫ ഇത്തവണത്തേത് കൂടാതെ 2030ല് നടക്കുന്ന അടുത്ത ലോകകപ്പ് മത്സരങ്ങളും ഉള്പ്പെടുത്തിക്കൊണ്ട് 100 ദശലക്ഷം ഡോളര് കരാര് ആണ് ഫിഫ ആവശ്യപ്പെട്ടിരുന്നത്. ഇത്രയും തുക മുടക്കാന് ബ്രോഡ്കാസ്റ്റര്മാര് തയ്യാറല്ലെന്ന് വന്നതോടെയാണ് ആശങ്കകള് ഉയര്ന്നത്.
ജൂണ് 11ന് മെക്സിക്കോ സിറ്റിയില് ആരംഭിച്ച് ജൂലൈ 19ന് ന്യൂജേഴ്സിയില് ഫൈനലോടുകൂടി ലോകകപ്പ് അവസാനിക്കും. ആകെ 104 മത്സരങ്ങളാണ് നടക്കുക.
