ന്യൂദല്‍ഹി: 2020 മുതല്‍ ഇന്നലെ വരെയായി ഭാരതത്തിനെതിരെ യുദ്ധം ചെയ്ത മുപ്പതിലേറെ ഭീകരരെയും തീവ്രവാദികളെയുമാണ് അജ്ഞാതര്‍ വെടിവച്ചുകൊന്നത്. ഇന്നലെ പാക്കധിനിവേശ കശ്മീരില്‍ അജ്ഞാതര്‍ വെടിയുതിര്‍ത്ത് വകവരുത്തിയ ഹംസ ബുര്‍ഹാനാണ് പട്ടികയിലെ ഒടുവിലത്തെയാള്‍.
പുല്‍വാമ ഭീകരാക്രമണത്തിന്റെ മുഖ്യസൂത്രധാരന്മാരില്‍ ഒരുവനായ ഇയാളെ മുസാഫറാബാദില്‍ വച്ചാണ് തീര്‍ത്തത്. കറാച്ചി, ലാഹോര്‍, റാവല്‍പിണ്ഡി, പെഷാവാര്‍ തുടങ്ങിയ സ്ഥലങ്ങളില്‍ വച്ച് അജ്ഞാതരുടെ തോക്കിനിരയായി തീര്‍ന്നത് കൊടും ഭീകരരാണ്. ഇന്നലത്തെ കൂടിയാകുമ്പോള്‍ കുറഞ്ഞത് 33 പേര് ഇങ്ങനെ കൊല്ലപ്പെട്ടിട്ടുണ്ടെന്നാണ് ഏകദേശ കണക്ക്. ഇന്ത്യന്‍ എയര്‍ ലൈന്‍സ് വിമാനം 99ല്‍ റാഞ്ചിയ കേസിലെ സഹൂര്‍ മിസ്ട്രി, ഖാലിസ്ഥാന്‍ കമാന്‍ഡോ ഫോഴ്‌സിലെ പരംജീത് സിങ്ങ് പാഞ്ജ്‌വാര്‍, പത്താന്‍കോട്ട് ഭീകരാക്രമണക്കേസിലെ മുഖ്യസൂത്രധാരന്‍ ഷഹീദ് ലത്തീഫ്, ഹിസ്ബുള്‍ മുജാഹിദ്ദീന്‍ ഭീകരന്‍ ബഷീര്‍ അഹമ്മദ് പീര്‍, അല്‍ ബദര്‍ കമാന്‍ഡര്‍ ഖാലീദ് റാസ, ഷഹീദ് അഖുണ്ഡ്, സലീം റഹ്‌മാനി, സിആര്‍പിഎഫ് ക്യാമ്പ് ആക്രമിച്ച കേസിലെ മുഖ്യപ്രതി ലഷ്‌ക്കര്‍ ഭീകരന്‍ റസാവുള്ള നിസാം, ഹാഫീസ് സെയ്ദിന്റെ അളിയന്‍ മൗലാന ഖാഷിഫ് അലി, സെയ്ഫുള്ള ഖാലീദ്, ഹാഫീസ് സെയ്ദിന്‍െസ അനുയായി അബുഖത്താള്‍, മുഫ്തി ഷാ മീര്‍, മുഫ്തി ഫയാസ്, അബ്ദുള്ള ഷഹീന്‍, ലഷ്‌ക്കര്‍ ഭീകരന്‍ ഹബീബുള്ള പുല്‍വാമ ഭീകരാക്രമണത്തിന്റെ സൂത്രധാരന്മാരില്‍ ഒരുവനായ ഹംസ ബുര്‍ഹാന്‍ എന്നിവര്‍ ഇതില്‍പ്പെടുന്നു.
