ന്യൂദല്ഹി: തെരഞ്ഞെടുപ്പുകളിലെല്ലാം ബിജെപി ആധിപത്യം നേടുകയാണെന്നും ഇതോടെ 1977ന് ശേഷം സിപിഎം ഭരണമില്ലാത്ത അവസ്ഥയിലെത്തിയെന്നും പാര്ട്ടി റിപ്പോര്ട്ട്. ബിജെപി വളര്ന്ന സിപിഎം തളര്ന്നു. നേതാക്കളുടെ അഴിമതി, ധാര്ഷ്ട്യം, ആഡംബര ജീവിതം, സ്ഥാനാര്ത്ഥി നിര്ണയത്തിലെ പാകപ്പിഴകള്, ഭരണവിരുദ്ധവികാരം, രാഷ്ട്രീയ പ്രചാരണത്തിന്റെ കുറവ് എന്നിവ കേരളത്തിലെ പരാജയത്തിന് കാരണമായെന്നും സിപിഎം കേന്ദ്ര കമ്മിറ്റിയുടെ അവലോകന റിപ്പോര്ട്ടില് പറയുന്നു.
2021ല് സീറ്റുകളൊന്നും ലഭിക്കാത്ത ബിജെപി 2026ല് മൂന്ന് സീറ്റുകളില് വിജയിച്ചു. ആറ് സീറ്റുകളില് രണ്ടാം സ്ഥാനത്തെത്തി. വിവിധ ക്ഷേത്ര കമ്മിറ്റികളിലെ ആര്എസ്എസ് സാന്നിധ്യവും വിശാലമായ ശാഖ ശൃംഖലയും വിജയകരമായി ഉപയോഗിക്കാന് ബിജെപിക്ക് കഴിഞ്ഞു. അതേസമയം 40 വര്ഷത്തിനിടയിലെ ഏറ്റവും കുറഞ്ഞ നിലയിലേക്ക് സിപിഎമ്മിന്റെ വോട്ട് വിഹിതം താഴ്ന്നു. 1977ന് ശേഷം ഭരണത്തിലുള്ള ഒരു സംസ്ഥാനം പോലും ഇല്ലാതായി. ബിജെപിയുടെ വളര്ച്ചയുടെ പശ്ചാത്തലത്തിലുള്ള പരാജയം വലിയ തിരിച്ചടിയാണെന്നും റിപ്പോര്ട്ടില് വിലയിരുത്തുന്നു.
പോളിറ്റ്ബ്യൂറോ അംഗമായ മുഖ്യമന്ത്രിയെ കേന്ദ്രീകരിച്ചുള്ള പ്രചാരണവും ദേവസ്വം ബോര്ഡ് മുന് പ്രസിഡന്റ് എ. പദ്മകുമാറിന്റെ അറസ്റ്റില് കൃത്യസമയത്ത് അച്ചടക്കനടപടി എടുക്കാതിരുന്നതും തിരിച്ചടിയായി. പിഎംശ്രീ വിവാദം സിപിഐ ഉന്നയിച്ചതും ഘടകകക്ഷികളെയും വിശ്വാസത്തിലെടുക്കാനാകാതെ വന്നതും പ്രതികൂലമായി. മന്ത്രിമാരെ നിരീക്ഷിക്കാനുള്ള പാര്ട്ടി കാബിനറ്റ് ഫ്രാക്ഷന് ഇല്ലാതിരുന്നതിനാല് പാര്ട്ടിയും സര്ക്കാരും തമ്മില് ഏകോപനമുണ്ടായില്ല.
നേതാക്കള്ക്കിടയിലെ അഴിമതി, ധാര്ഷ്ട്യം, ആഡംബരജീവിതം എന്നിവ പ്രതിച്ഛായ തകര്ത്തു. ചില സന്ദര്ഭങ്ങളില് മാധ്യമങ്ങളോടുള്ള സഖാക്കളുടെ പ്രതികരണങ്ങള് ഒഴിവാക്കാമായിരുന്നു. പോലീസിന്റെയും ബ്യൂറോക്രസിയുടെയും ജനവിരുദ്ധ പെരുമാറ്റവും ചില മന്ത്രിമാരെ സമീപിക്കാനുള്ള ബുദ്ധിമുട്ടും ജനങ്ങളെ പാര്ട്ടിയില് നിന്നകറ്റി. കണ്ണൂര് ഉള്പ്പെടെയുള്ള ജില്ലകളില് സ്ഥാനാര്ത്ഥി നിര്ണയത്തില് പാളിച്ചകളുണ്ടായി. തളിപ്പറമ്പ്, പയ്യന്നൂര്, അമ്പലപ്പുഴ എന്നീ പാര്ട്ടി കോട്ടകളില് വിമതരായി മത്സരിച്ചവര് വിജയിച്ചത് പാര്ട്ടിക്കേറ്റ വലിയ പ്രഹരമാണെന്നും റിപ്പോര്ട്ടില് പറയുന്നു. ബിജെപിക്കെതിരായ രാഷ്ട്രീയ, ആശയപരമായ പോരാട്ടത്തില് പാര്ട്ടി കൂടുതല് ശ്രദ്ധകേന്ദ്രീകരിക്കണമെന്നും ബിജെപിയെ ചെറുക്കുന്നതിനുള്ള ബലഹീനതകള് തരണം ചെയ്യണമെന്നും നിര്ദേശിച്ചാണ് റിപ്പോര്ട്ട് അവസാനിപ്പിച്ചിരിക്കുന്നത്.
